АПБ: Паляўнічае лобі нацэлілася на „чырвонакніжнікаў”
На днях у адкрытым доступе з’явіўся адказ Міністэрства лясной гаспадаркі Савету міністраў, у якім Мінлясгас просіць уключыць рысь у спіс паляўнічых відаў.
Грамадская арганізацыя «Ахова птушак Бацькаўшчыны» выступіла ў абарону рысі еўрапейскай.
Распавядае кіраўнік АПБ Аляксандр Вінчэўскі:
– Пытанне гэтае не новае, па ўключэнні рысі ў паляўнічыя віды і выключэнне з Чырвонай кнігі. Узнімалася яно і 10 гадоў таму. Справа датычыць не толькі рысі, але і мядзведзя, і барсука. Паляўнічыя хочуць страляць гэтыя тры віды жывёл, якія сёння ўключаны ў Чырвоную кнігу. У 80-х гадах у нас папуляцыя рысі ацэньвалася ў 400 асобін. У 2001-ы – 200 асобін. У 2015-ы – 850. На сёння колькі рысяў дакладна невядома.
Пакуль сітуацыя супакоена да вызначэння велічыні папуляцыі рысі ў Беларусі.
Паводле навуковай супрацоўніцы Цэнтру біярэсурсаў Акадэміі навук Ганны Сідаровіч, калі на рысяў пачнуць паляваць, беларуская прырода сутыкнецца з праблемай рэзкага павелічэння янотападобных сабак. Гэта інвазіўны від, на іх не палююць з-за нізкай каштоўнасці, затое янотападобныя сабакі нішчаць барсукоў, масава хварэюць шаленствам і г.д. Натуральнымі кантралёрамі гэтага віду з’яўляюцца ваўкі і рысі.
– Рыс досыць эфектыўна здабывае янотападобных сабак. Рыс здабывае столькі янотападобных сабак, колькі на сённяшні дзень адстрэльваюць паляўнічыя. Калі мы выводзім рыс з Чырвонай кнігі і пачынаем яе страляць, то адпаведна паляванне на янотападобную сабаку павінна быць інтэнсіфікавана як мінімум у два разы. Інакш мы будзем мець вельмі сур’ёзныя праблемы з цецеруковымі птушкамі, мы будзем мець праблемы з качкавымі птушкамі, з шаленствам, бо пачнуцца стабільныя выпадкі шаленства, у выніку барсук практычна знікне.
АПБ заклікае неабыякавых да роднай прыроды людзей падпісаць петыцыю ў абарону рысі еўрапейскай праз сервіс „Зручны горад. Petitions.by”.
Беларускае Радыё Рацыя
