Аршанскага блогера знялі з выбараў і затрымалі
Дзмітрыю Казлову, які вядзе відэаблог пад нікам “Шэры кот”, абвясцілі ўжо другое папярэджанне і скасавалі рэгістрацыю ў якасці кандыдата.
Першае папярэджанне акруговая выбачая камісія вынесла яму за плакаты «Калгаснай дыктатуры – баста!» і «Фальшывым выбарам – баста!», якія кандыдат выкарыстоўваў іх на сваіх агітацыйных пікетах. Камісія папярэдзіла, што за паўторнае выкарыстанне гэтых плакатаў Дзмітрыю Казлову будзе абвешчана новае спагнанне, але гэта хлопца не спыніла.
Адбылося чарговае пасяджэнне акруговай камісіі, дзе кандыдату абвясцілі ўжо другое папярэджанне, паведаміў назіральнік, праваабаронца Васіль Бераснеў:
– Я ім кажу: “Ён жа выступае супраць фальшывых выбараў. Ці вы за фальшывыя выбары, раз яго хочаце за гэта пакараць? Што да дыктатуры, то Эйсмант, сакратарка Лукашэнкі, сказала, што дыктатура- гэта наш брэнд. А што супраць калгаснай, дык у нас шмат негатыву супраць калгасаў!” І яны ў спешным парадку прагаласавалі адзінадушна, як заўсёды, за тое, каб адклікаць ягоную рэгістрацыю”.
Атрымаўшы запрашэнне на пасяджэнне камісіі, Дзмірый Казлоў не выключаў магчымасці, што справа скончыцца скасаваннем рэгістрацыі. Учора ўвечары да яго прыходзіў участковы міліцыянт, нібыта “проста, каб пазнаёміцца”. У блогера склалася ўражанне, што яго хочуць затрымаць у Воршы, каб ён не змог трапіць на сход, які склікае ў Менску блогер NEXTA.
Апасенні Дзмітрыя Казлова апраўдаліся: раніцай , калі ён ужо выправіўся ў дарогу, яго затрымалі міліцыянта і настойліва параілі наведаць пасяджэнне камісіі. Неўзабаве хлопца адпусцілі, але другая спроба паехаць у Менск зноўку скончылася затрыманнем. Прычына пакуль не вядомая, хлопец знаходзіцца ў пастарунку, прыкладна з 12.30 ягоны тэлефон адключаны.
Беларускае Радыё Рацыя, Ворша
