Аршанскія камуністы пажадалі Леніну «чуць цёплыя словы ў жыцці»
Даволі вялікі мітынг камуністаў нечакана адбыўся 7-га лістапада ў Воршы. У апошнія гады адзначаць Дзень кастрычніцкай рэвалюцыі збіраўся ад сілы дзясятак камуністаў, арганізаванасць была слабая. На гэты раз, у 99-ю гадавіну рэвалюцыі, камуністы правялі даволі масавы мітынг. Да помніка правадыра сусветнага пралетарыяту Уладзіміра Леніна прыйшлі каля 50 чалавек.
Былі нават людзі, апранутыя ў чырвона-зялёныя шалікі, пад сцяг БССР і цяперашні дзяржаўны сімвал. Непрацяглыя выступы побач з помнікам завяршыліся ўскладаннем кветак на пастамент. Чырвоны гваздзік стаў сімвалам, адзінай кветкай, якую дамовіліся прынесці камуністы. Акрамя таго, на помнік паклалі і віншавальную паштоўку з тэкстам на расейскай мове, якой звычайна віншуюць жывых людзей, а не памерлых:
Пусть в жизни ждут тебя
Лишь тёплые слова.
И сердце никогда,
От боли не заплачет.
И пусть твоя кружится голова,
От счастья, от любви и от удачи!
Святкаванне гадавіны Кастрычнніцкай рэвалюцыі сёлета, верагодна, якраз у Воршы было найбольш масавым. Адзін з камуністычных актывістаў спрабаваў далучыць да акцыі каля помніка і звычайных аршанцаў, якія ішлі ў крамы, у банкі. Аднак ніхто з мінакоў да мітынгу левых сілаў не далучыўся. У абласным цэнтры Віцебску на мітынг сабраліся не болей за 40 чалавек. Затое віцебскія камуністы адзначыліся плакатам «Мы — за Савецкі саюз».
Кастусь Багушэвіч, Беларускае Радыё Рацыя, Ворша
Глядзіце таксама
