Арцыбіскуп Тадэвуш Кандрусевіч заклікае маліцца пра выбаўленне ад эпідэміі каронавірусу
Кіраўнік Каталіцкай царквы ў Беларусі Арцыбіскуп Тадэвуш Кандрусевіч выступіў са зваротам да вернікаў і святароў.
ЗВАРОТ
Арцыбіскупа Тадэвуша Кандрусевіча Мітрапаліта Менска-Магілёўскага Старшыні Канферэнцыі Каталіцкіх Біскупаў у Беларусі
Свет ахапіла эпідэмія каронавірусу. Заразная і небяспечная хвароба праяўляецца ва ўсё большай колькасці краін свету, у тым ліку і ў Беларусі. Лекары і санітарныя службы робяць усё магчымае, каб яе прадухіліць і як мага хутчэй вылечыць захварэўшых. Пры гэтым яны нават рызыкуюць сваім жыццём.
У той самы час, памятаючы пра словы Хрыста, што без Яго мы нічога не можам зрабіць (пар. Ян 15, 5), іх ахвярныя высілкі неабходна падмацаваць малітвай.
У сувязі з гэтым звяртаюся да святароў і вернікаў з заклікам на кожнай святой Імшы падчас малітвы вернікаў маліцца ў інтэнцыі абароны нашага народа ад гэтай небяспечнай заразнай хваробы, а таксама ў інтэнцыі ўсіх захварэўшых, лекараў і супрацоўнікаў службы аховы здароўя.
Заахвочваю таксама пасля цэнтральных нядзельных і святочных Імшаў спяваць суплікацыю «Святы Божа, Святы моцны, Святы нясмяротны», каб прасіць міласэрнага Бога аб выбаўленні ад небяспечнай пагрозы каронавірусу.
Адначасова звяртаюся да вернікаў з заклікам захоўваць спакой, выконваць распараджэнні душпастыраў, прадпісанні лекараў і асабліва дбаць пра захаванне адпаведных санітарных нормаў.
Няхай добры і міласэрны Бог праз заступніцтва святога Роха, апекуна і абаронцы ад заразных хваробаў, захавае нас ад эпідэміі каранавірусу і адорыць ласкаю здароўя душы і цела.
З благаслаўленнем
Арцыбіскуп Тадэвуш Кандрусевіч Мітрапаліт Менска-Магілёўскі Старшыня Канферэнцыі Каталіцкіх Біскупаў у Беларусі
