Барыса Хамайду аштрафавалі за віншаванне з Днём Волі
Віцебскі грамадскі актывіст 70-гадовы Барыс Хамайда аштрафаваны на адну базавую велічыню за віншаванне грамадзян з Днём Волі.
Як паведамляе spring96.org, адміністрацыйную справу ў дачыненні да яго на падставе артыкула 23.34 КоАП (парушэнне парадку арганізацыі і правядзення масавых мерапрыемстваў) 12 красавіка разгледзеў суд Чыгуначнага раёна Віцебска.
Падставай для складання пратакола стала віншаванне жыхароў абласнога цэнтра са 100-годдзем БНР: актывіст вывесіў на сваім балконе некалькі расцяжак з лозунгамі і віншаваннямі.
Барыс Хамайда, пачынаючы з 1997 года, практычна кожны дзень распаўсюджвае ў цэнтры Віцебска незалежныя газеты, улёткі, нацыянальную сімволіку. Яго неаднаразова затрымлівалі і каралі ў адміністрацыйным парадку за ўдзел у несанкцыянаваных пікетах і проста па надуманых падставах.
Барыс Хамайда з’яўляецца ганаровым членам Праваабарончага цэнтра „Вясна”.
Фота Алены Сцяпанавай
Глядзіце таксама
