Бацькоў дашкалят заклікаюць станавіцца на ўлік у беларускамоўныя групы
Гомельскія моўныя актывісты дамагліся саступак ад уладаў у пытанні беларускамоўных груп і садочкаў. Кіраўнік гомельскай філіі Таварыства Беларускай Мовы імя Францішка Скарыны Алеся Аўласевіч атрымала адказ ад дэпутатаў гарсавета. У дакуменце пазначаецца, што па хадайніцтве аддзела адукацыі гарвыканкама ў Гомелі пры пастаноўцы на ўлік дзяцей у дашкольныя ўстановы ў службе „Адно акно” бацькам прадаставіцца магчымасць выбара мовы навучання. Алеся Аўласевіч заклікае гомельскіх бацькоў дашкалятаў станавіцца на ўлік у беларускамоўныя групы.
– Бацькі, якія хочуць, каб іх дзеці навучаліся на беларускай мове, могуць прыходзіць у гарвыканкам і станавіцца ў гэтую чаргу. А гарвыканкам вырашае, што гэта будзе за садок, у якім раёне, хто там будзе выкладаць. То бок, практычныя пытанні на сябе бярэ гарвыканкам. Яны і кажуць, што садкоў шмат, выкладчыкаў беларускамоўных шмат, вось і паглядзім, што атрымаецца на практыцы. Цяпер усё ў нашых руках. Гэта сапраўдны выклік, бо да нас (у ТБМ) звяртаецца вельмі шмат бацькоў. Але вельмі важна, каб бацькі актывізаваліся, пайшлі ў выканкамы і сталі на ўлік.
У 2018-2019 гадах, паводле інфармацыі Гомельскага гарсавета, у Гомелі будуць дзейнічаць дзве беларускамоўныя групы для дашкалятаў у Чыгуначным і Савецкім раёнах.
Беларускае Радыё Рацыя, Гомель
Глядзіце таксама
