Беларусь – адзіная ў былым СССР, якая працягвае русіфікацыю
Пра гэта гаворыцца ў даследаванні, праведзеным The Financial Times. Характэрна, што папулярнасць расейскай мовы ў Беларусі расце на фоне агульнага скарачэння яго карыстальнікаў у свеце.
Як адзначаецца ў даследаванні, з усіх постсавецкіх краін расейская мова ўзмацняе свае пазіцыі толькі ў Беларусі. У 1989 годзе расейскамоўных у нашай краіне было па дадзеных The Financial Times – 32,3%, у 1994 – ужо 49,6, а ў 2016 – 71%, паведамляе Thinktanks.by.
Як паведамляецца ў даследаванні, лік тых, хто выкарыстоўвае рускую мову ў Казахстане скараціўся з 33% у 1994 годзе да 20% у 2016 годзе. У Эстоніі і Латвіі – з 40% і 33% да 29% і 23% адпаведна. Ва Украіне колькасць расейскамоўных знізілася за той жа перыяд з 32,4% да 24,4%.
Менш за ўсё людзей, якія лічаць расейскую асноўнай мовай зносін засталося ў Грузіі – 1,1%.
Як адзначае gazeta.ru, хоць расейская мова ўсё яшчэ ўваходзіць у дзясятку самых распаўсюджаных у свеце, але займае толькі восьмае месца і ўжо саступае, напрыклад, бенгальскай.
На расейскай мове як на роднай на планеце гавораць каля 170 мільёнаў чалавек, і гэты лік у апошнія гады няўхільна зніжаецца.
Прычым за межамі Расеі колькасць носьбітаў рускай як роднай складае ўсяго каля 25 мільёнаў чалавек. Большасць з іх жывуць у былых савецкіх рэспубліках, якія альбо ўжо аддаліліся ад Расеі (як краіны Балтыі), альбо выбіраюць асцярожны, але ўсё больш самастойны курс (як той жа Казахстан).
Эканамічную канкурэнцыю з англамоўнымі краінамі расейскамоўны свет таксама прайграе. Носьбіты англійскай мовы вырабляюць больш за 29% сусветнага ВУП. Носьбіты расейска – 2,5%.
