Беларус хацеў увезці 178 брыкетаў гашышу
Спробу ўвезці ў Беларусь 178 брыкетаў гашышу спынілі гарадзенскія мытнікі.
Як паведамляе Дзяржаўны мытны камітэт, легкавы аўтамабіль „Нісан” уязджаў у Беларусь з Польшчы па зялёным калідоры праз пункт пропуску „Брузгі” Гарадзенскай рэгіянальнай мытні.
У выніку правядзення мытнага надгляду з выкарыстаннем тэхнічных сродкаў кантролю, а таксама магчымасцяў кіналагічнай службы мытні ў канструктыўных поласцях аўтамабіля выяўлена 178 брыкетаў з рэчывам расліннага паходжання зялёна-карычневага колеру, абкручаных ліпкай стужкай.
Заключэнне эксперта ўпраўлення Дзяржаўнага камітэта судовых экспертыз па Гродзенскай вобласці пацвердзіла, што рэчыва з’яўляецца небяспечным наркатычным сродкам — гашышам. Агульная вага наркотыкаў разам з брыкетамі склала каля 78 кг.
У дачыненні да грамадзяніна Беларусі распачата справа ў адпаведнасці з ч. 2 арт. 328-1 Крымінальнага кодэкса. За незаконнае перамяшчэнне праз мытную мяжу наркатычных сродкаў у буйным памеры мужчыну пагражае пазбаўленне волі тэрмінам да 10 гадоў з канфіскацыяй маёмасці або без канфіскацыі.
Фота grt.customs.gov.by
