Беларуская АЭС: права на атам і жыццё
Грамадская дыскусія на тэму наступстваў Чарнобыльскай аварыі і сучаснага стану будаўніцтва беларускай атамнай электроўні прайшла ў Гародні.
Гарадзеншчына – тэрыторыя, дзе будуецца новая атамная электроўня. Што гэта прынясе беларусам? Энергетычную „падушку бяспекі” ці страту апошняй экалагічна чыстай часткі краіны? На гэтыя пытанні дапамаглі ўдзельнікам адказаць адмысловыя госці дыскусіі.
Уладзімір Целяпун – ліквідатар Чарнобыльскай аварыі з Мазыра падзяліўся сваімі ўспамінамі пра трагічныя падзеі, у якіх прымаў удзел.
– Спачатку нейтральна, а потым як удзельнік ліквідацыі наступстваў аварыі. Тады ўсім кіравала КПБ-КПСС, і выбару не было: куды загадалі – туды і паехаў. І рабіў тое, што рабілася: будаваў дамы для перасяленцаў там, адкуль пазней людзі зноў былі выселеныя. Гэта былі 90-ыя гады, калі людзі былі пакінутыя сам-насам з эканамічнымі праблемамі, на якія яшчэ лёг адбітак Чарнобыльскай катастрофы.
У той жа час ініцыятар кампаніі “Астравецкая атамная – гэта злачынства” Мікалай Уласевіч звярнуў увагу на небяспеку беларускай АЭС, якая паўстае на Гарадзеншчыне. На яго думку, няма ніякіх рацыянальных тлумачэнняў неабходнай атамнай станцыі:
– Будаўніцтва працягваецца, нягледзячы на тое, што фінансаванне зменшылася, заробкі людзей упалі, ёсць вялізная цякучка кадраў. На жаль, ніякіх зрухаў не робіць і той ціск, які ідзе з боку беларускай антыядзернай кампаніі. Але перадусім дзеянні Літвы, якая моцна цісне на беларускі бок у сувязі з гэтым будаўніцтвам, якое працягваецца і пасля таго шэрагу надзвычайных сітуацый, якія адбыліся.
У дыскусіі актыўна ўдзельнічалі гарадзенцы. Не ўсе адназначна ўспрымаюць рашэнне менскіх уладаў будаваць электроўню. Але актыўнасць у кірунку закрыцця гэтага аб’екта вельмі нізкая ў беларусаў – падвялі вынікі ўдзельнікі мерапрыемства.
[Not a valid template]Якуб Сушчынскі, Беларускае Радыё Рацыя, Гародня
Фота аўтара
