Беларускімі прызыўнікамі зоймецца пракуратура
У выпадку ўхілення ад праходжання ваеннай службы маладым людзям пагражае крымінальная адказнасць і пакаранне ў выглядзе пазбаўлення волі да двух гадоў. Чарговая прызыўная кампанія праходзіць у краіне са жніўня па лістапад.
На днях у Менскім абласным выканаўчым камітэце абмеркавалі асаблівасці чарговага прызыву і падвялі вынікі кампаніі, якая праходзіла ў лютым-траўні 2017 года. Нагадаем, тады 291 чалавек аб’явілі ў вышук, піша tut.by.
«У сувязі з гэтым неабходна нагадаць грамадзянам, што абарона Рэспублікі Беларусь з’яўляецца канстытуцыйнай абавязкам і святым абавязкам кожнага грамадзяніна», – кажа Дзяніс Гірлоўскі, старшы пракурор аддзела па наглядзе за адпаведнасцю заканадаўства ў войсках пракуратуры Менскай вобласці.
Пракуратура прасочыць, каб усе прызыўнікі з’явіліся ў ваенкамат. Тыя, хто без уважлівай прычыны будуць ігнараваць позвы або адмовяцца ад яе атрымання, могуць быць прыцягнутыя да адміністрацыйнай адказнасці (ч. 3 арт. 25.1 Кодэкса аб адміністрацыйных правапарушэннях).
Санкцыя артыкула прадугледжвае папярэджанне або штраф да 115 рублёў. Для прызыўнікоў, якія «бегаюць ад войска» ужо не першы дзень, прадугледжана больш суровае пакаранне па арт. 435 КК «Ухіленне ад мерапрыемстваў прызыву на вайсковую службу»: да двух гадоў пазбаўлення волі.
«Ухіленне ад мерапрыемстваў прызыву могуць палічыць няяўку без паважных прычын на медыцынскае абследаванне, пасяджэнне прызыўной камісіі, на прызыўны пункт ва ўстаноўлены i ўказаны ў позве тэрмін», – ўдакладняюць ў пракуратуры Менскай вобласці.
