БХД прапануе зрабіць Дзяды дзяржаўным святам
Свята ўшанавання продкаў – Дзяды, павінна быць вернута ў каляндар, як дзяржаўнае свята.
Гарадзенскія сябры Беларускай Хрысціянскай Дэмакратыі пачалі акцыю па збору подпісаў пад зваротам на імя кіраўніка Беларусі, каб 2 лістапада стала дзяржаўным выходным днём. 7 лістапада, як свята бальшавікоў, павінна быць прыбрана з ліку выходных.
Кажа старшыня Гарадзенскага гарадскога камітэта па стварэнні партыі БХД Яўген Дудкін:
– Мы прапануем перанесці дзяржаўны выходны дзень з 7-га лістапада на 2-га лістапада. Тры галоўныя вынікі, якія прапануем уладам, чаму гэта варта зрабіць. Першае, мы выконваем у поўнай меры артыкул 2.4 Канстытуцыі Рэспублікі Беларусь. Другое, фактычна ўмацоўваюцца сямейныя каштоўнасці праз наведванне членамі сям’і могілак продкаў. І канешне ж у рамках абвешчанай кіраўніком дзяржавы Годам малой радзімы. Мы далучаемся, каб людзі звярталі больш увагі на сваю малую радзіму.
Odtwarzacz plików dźwiękowych
На думку складальнікаў звароту, свята Дзяды ўмацоўвае сямейныя каштоўнасці, патрыятызм, а таксама адпавядае канстытуцыі краіны пра дэідэалагізацыю грамадскага і культурнага жыцця.
Арганізатары плануюць весці кампанію па зборы подпісаў цягам двух месяцаў.
Беларускае Радыё Рацыя, Гародня
