Брыфінг Мінаховы здароўя, прысвечаны трагічнаму выпадку ў Ганцавіцкім раёне
Верагоднай прычынай смерці двухмесячнага хлопчыка, які памёр 13 жніўня ў Ганцавіцкім раёне пасля планавай вакцынацыі, стала анафілактычная рэакцыя на адэкватна ўведзены прэпарат. Пра гэта заявіла на брыфінгу 29 жніўня ў Менску начальнік аддзела медыцынскай дапамогі маці і дзецям галоўнага ўпраўлення арганізацыі медыцынскай дапамогі і экспертызы Міністэрства аховы здароўя Беларусі Людміла Лёгкая.
Па факце гібелі дзіцяці, адзначыла яна, міністэрства стварыла камісію, правяло ацэнку якасці аказання медыцынскай дапамогі. Выпадак быў разгледжаны на лячэбна-кантрольным савеце Міністэрства аховы здароўя.
Лёгкая падкрэсліла, што развіццё паталагічнага працэсу, які прывёў да крытычнага стану, было непрадказальным. „Смяротны зыход у сувязі з маланкавым цячэннем паталагічнага працэсу было немагчыма прадухіліць”, — заявіла прадстаўнік Міністэрства аховы здароўя.
Паводле слоў Лёгкай, аб`ём і парадак аказання экстранай медыцынскай дапамогі дзіцяці на ўсіх этапах адпавядаў цяжару яго стану, выстаўленаму дыягназу і ажыццяўляўся ў адпаведнасці з нарматыўнымі прававымі актамі Міністэрства аховы здароўя.
Камісія не ўстанавіла парушэнняў тэмпературнага рэжыму пры транспартаванні і захоўванні вакцын названых серый, якія маглі паўплываць на іх якасць, дадала яна. „Па выніках расследавання сітуацыі фактаў, якія б ускосна і прама пацвярджалі парушэнне тэхнікі ўвядзення вакцын і выканання санітарна-супрацьэпідэмічных патрабаванняў, выяўлена не было. Працягваецца праца іншых кампетэнтных органаў па расследаванні факта смерці дзіцяці”, — сказала прадстаўнік Міністэрства аховы здароўя.
Трагедыя здарылася 13 жніўня ў Ганцавіцкім раёне Брэсцкай вобласці. Бацькі двухмесячнага хлопчыка даставілі яго ў фельчарска-акушэрскі пункт на планавую вакцынацыю. Пасля ўвядзення некалькіх прышчэпак дзіця пачало задыхацца. Брыгада хуткай дапамогі даставіла хлопчыка ў Ганцавіцкую цэнтральную раённую бальніцу, але выратаваць дзіця не ўдалося. Ганцавіцкі раённы аддзел Следчага камітэта ініцыяваў праверку па факце смерці дзіцяці. Былі прызначаны экспертныя даследаванні канфіскаваных медыцынскіх дакументаў і прэпаратаў, у прыватнасці дзвюх вакцын, якія ўвялі дзіцяці, — „Эупента” (LG Chem, Паўднёвая Карэя) і „Імавакс Полія” (Sanofi Pasteur, Францыя). Прымяненне дзвюх серый вакцын „Эупента” і „Імавакс Полія” ў Беларусі прыпынена да завяршэння расследавання.
Рашэнне аб увозе і выкарыстанні незарэгістраванай у Беларусі вакцыны „Эупента” Міністэрства аховы здароўя прыняло для прадухілення зрыву календара імунапрафілактыкі і папярэджання надзвычайнай сітуацыі, а менавіта ўспышак інфекцыйных захворванняў, якія пагражаюць жыццю. Пра гэта заявіла на брыфінгу 29 жніўня ў Менску начальнік упраўлення фармацэўтычнай інспекцыі і арганізацыі лекавага забеспячэння Міністэрства аховы здароўя Людміла Равуцкая.
Неабходнасць прыняцця такога рашэння была абумоўленая „вострым недахопам” у Беларусі вакцын для прафілактыкі дыфтэрыі, коклюшу і слупняку.
Равуцкая паведаміла, што ў 2017 годзе ў Беларусі ўзнікла крытычная сітуацыя з пастаўкай АКДС-вакцыны ад традыцыйнага вытворцы і пастаўшчыка з Расіі. Яна патлумачыла, што практычна штогод выяўляліся праблемы з якасцю вакцыны, бракаваліся асобныя партыі. Аналагічныя факты адзначаліся і на тэрыторыі Расіі, адзначыла прадстаўнік Міністэрства аховы здароўя.
Глядзіце таксама
