Бярозаўскія праваабаронцы даслалі калегам бандэролі салідарнасці
Бярозаўскія праваабаронцы адправілі невялікія бандэролі з рознымі прысмакамі сваім калегам-праваабаронцам, якія сядзяць у СІЗА на Валадарцы. У бандэролі пакладзены яблыкі, цыбуля, часнык, а таксама розныя слодычы і сшыткі з асадкамі.
Праваабаронцы спадзяюцца, што іх калегі атрымаюць бандэролі, кажа Сяржук Русецкі:
– Мы даслалі бандэролькі салідарнасці зняволеным праваабаронцам „вясноўцам” – Алесю Бяляцкаму, Вадянціну Стэфановічу, Уладзю Лабковічу, Марфе Рабковай і Андрэю Чапюку. Хочацца ў гэтыя восеньскія дажджлівыя дні хоць нейкім чынам трошкі паспрабаваць узняць ім настрой ды выказаць сваю падтрымку і салідарнасць.
Алесь Бяляцкі, Валянцін Стэфановіч і Уладзімір Лабковіч арыштаваны ў ліпені мінулага году і чакаюць суду. Марфа Рабкова і Андрэй Чапюк ужо асуджаны на вялікія тэрміны, але чакаюць разгляду апеляцыйных скаргаў.
Беларускае Радыё Рацыя
