Чарговае здарэнне на „Гродна Азоце”
У аўторак, 31 студзеня, каля 17.25 на «Гродна Азот» грузавы аўтамабіль збіў трубавод, па якім падаецца вадкі аміяк з цэха Аміяк-3 у міжцэхавыя камунікацыі прадпрыемства.
Як паведамляе прэс-служба «Азота», пасля надзвычайнага здарэння былі аператыўна прыняты меры па лакалізацыі і ліквідацыі інцыдэнту і яго наступстваў. Трубавод адключаны запорнай арматурай. Небяспечная зона агароджана. Праводзяцца замеры на ўтрыманне аміяку па перыметры тэрыторыі прадпрыемства.
Таксама паведамляецца, што пацярпелых няма. Няма пагрозы жыццю і здароўю людзей на прадпрыемстве і жыхароў горада.
Аднак некаторым жыхарам паступаюць званкі ад родных і блізкіх, якія працуюць на прадпрыемстве. Яны кажуць, што лепш не адчыняць вокны і не выходзіць на вуліцу.
Па стане на 18.30 замеры ўтрымання аміяку на мяжы санітарна-ахоўнай зоны (раён гаргазу) і ў бліжэйшай жылой забудове (завулак Куйбышава) — ніжэй адчувальнасці метаду вымярэння.
