Частка суда па справе Бабарыкі пройдзе за зачыненымі дзвярыма
Вярхоўны суд Беларусі прыняў рашэнне частку судовага працэсу па справе экс-кіраўніка Белгазпрамбанка Віктара Бабарыкі правесці ў закрытым судовым пасяджэнні.
Гучны крымінальны працэс, па якім праходзяць яшчэ сем абвінавачаных, сярод якіх — былыя намеснікі асноўнага фігуранта справы, доўжыцца ўжо больш за два месяцы. Абвінавачаных судзяць за карупцыйныя злачынствы. Ужо амаль месяц у судзе ідзе допыт сведкаў па справе. Адначасова пракуроры зачытваюць матэрыялы крымінальнай справы — у мэтах эканоміі судовага часу.
„Прынята рашэнне аб тым, што частка судовага паседжання пройдзе за зачыненымі дзвярыма. Сёння пракурор будзе агучваць матэрыялы справы, якія змяшчаюць так званую камерцыйную тайну”, — паведаміў Sputnik інфармаваная крыніца, знаёмая з ходам судовага працэсу.
Паводле яе слоў, сёння да абеду справу будуць разглядаць у закрытым судовым пасяджэнні. Суразмоўца растлумачыў, што гэта дакументы, у тым ліку і банкаўскія, на якіх ёсць адмысловая пазнака аб наяўнасці інфармацыі, якая складае камерцыйную ці дзяржаўную тайну.
Суразмоўца агенцтва таксама ўдакладніў, што правесці частку судовага паседжання за зачыненымі дзвярыма папрасіў дзяржаўны абвінаваўца. Суд задаволіў яго хадайніцтва. У судзе дапытаная ўжо большая частка сведак.
„Дапытаць засталося зусім няшмат, ужо пераважная колькасць сведкаў дапытаныя”, — сказаў суразмоўца агенцтва.
Матэрыялы крымінальнай справы складаюць каля 120 тамоў. Усе, акрамя галоўнага фігуранта, далі прызнальныя паказанні і прызналі віну.
Паводле следства КДБ, на базе Белгазпрамбанка пад кіраўніцтвам Бабарыкі дзейнічала арганізаваная злачынная група, якая выводзіла грошы за мяжу. Паводле абвінавачання, зачытанага ў судзе, ядро злачыннай групы, якую Бабарыка стварыў з сваіх намеснікаў, сфармавалася да 2008 года, а да 2020 года экс-банкір каардынаваў дзеянні яе ўдзельнікаў, займаўся размеркаваннем роляў і прызначаў сумы незаконнага ўзнагароджання.
Бабарыка абвінавачваецца ў атрыманні хабару арганізаванай групай і легалізацыі даходаў, атрыманых злачынным шляхам, у абодвух выпадках — у асабліва буйным памеры. Яму ставіцца таксама ўчыненне ў 2018 годзе фінансавых аперацый па набыцці двух капiтальных будынкаў у Менску ў мэтах легалізацыі сродкаў, атрыманых злачынным шляхам. Па інкрымінаваных злачынствах Бабарыку ў адпаведнасці з беларускім заканадаўствам пагражае пазбаўленне волі на тэрмін да 15 гадоў.
Раней былы банкір адмовіўся заключыць пагадненне са следствам, каб паменшыць максімальнае пакаранне, сваю віну ў поўным аб’ёме ён не прызнаў.
belaruspartisan.by novychas.by
