Да 25 градусаў цяпла чакаецца ў Беларусі ў выхадныя
Да 25 градусаў цяпла чакаецца ў Беларусі ў выхадныя, паведамілі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
„У бліжэйшыя двое сутак пераважны ўплыў на характар надвор’я ў нашай краіне будзе аказваць антыцыклон, які раскінуўся над паўночна-заходнімі раёнамі еўрапейскай часткі Расеі. Антыцыклон сфарміраваны ў халаднаватым паветры, таму ў паўночна-ўсходніх раёнах нашай краіны па начах будзе даволі свежа”, – расказалі ў Гідрамеце.
У пятніцу, 11 траўня, будзе пераважна без ападкаў. Тэмпература паветра ўначы складзе 7-13 градусаў вышэй за нуль, па паўночным усходзе краіны месцамі будзе плюс 2-6. Удзень чакаецца 18-24 градусы цяпла.
У суботу, 12 траўня, будзе пераважна без ападкаў, толькі ўдзень у асобных раёнах па паўднёвым усходзе Гомельскай вобласці магчымы кароткачасовыя дажджы. Тэмпература паветра ўначы – 3-8 градусаў вышэй за нуль, удзень будзе 20-25 градусаў цяпла.
У нядзелю, 13 траўня, пад уплывам атмасферных франтоў уначы ў паўднёва-ўсходніх раёнах, а ўдзень на большай частцы тэрыторыі краіны пройдуць кароткачасовыя дажджы, месцамі прагрымяць навальніцы. Тэмпература паветра ўначы складзе 6-12 градусаў вышэй за нуль, а ўдзень будзе знаходзіцца ў межах ад плюс 16 па паўднёвым усходзе да 23 градусаў цяпла па паўночным захадзе краіны.
