Стала вядома, у чым падазраюць Уладзіміра Мацкевіча (абноўлена)
Стала вядома, у чым падазраюць філосафа і метадолага Уладзіміра Мацкевіча. Палітвязень знаходзіцца за кратамі з 4 жніўня. Са слоў адваката Дзмітрыя Лазавіка, Мацкевіча падазраюць у арганізацыі групавых дзеянняў, якія груба парушаюць грамадскі парадак (ч. 1 арт. 342 Крымінальнага кодэкса, да чатырох гадоў пазбаўлення волі). Пры гэтым допыт у якасці падазраванага не праводзіўся.
„Уладзімір адчувае сябе нармальна, бадзёрасці духу і пачуцця гумару не страціў. Віну не прызнае. Усім перадае прывітанне. Сваё цяперашняе становішча ўспрымае па-філасофску”, — сказаў Дзмітрый Лазавік.
* * *
Філосаф і метадолаг Уладзімір Мацкевіч знаходзіцца ў ІЧУ на Акрэсціна. У чым ён абвінавачваецца, спрабуе разабрацца адвакат Дзмітрый Лазавік. Пакуль марна. Магчыма, філосафа ўжо дапыталі.
Пра гэта адвакат Дзмітрый Лазавік паведаміў @nashaniva. Ён адзначыў, што дагэтуль не змог наведаць свайго падабароннага, якога затрымалі два дні таму.
Адвакат разлічваў, што раніцай у пятніцу, 6 жніўня, здолее атрымаць у УСК інфармацыю аб тым, хто з’яўляецца следчым па справе, ці можа ён сустрэнецца з падабаронным і ў чым сутнасць прад’яўленых філосафу прэтэнзій.
Аднак пакуль адвакат нічога не здолеў даведацца. Пра гэта адвакат Дзмітрый Лазавік паведаміў @nashaniva.
«4 жніўня з’явілася інфармацыя, што ва Уладзіміра праводзіцца ператрус, з ім знікла сувязь, у нас быў інфармацыйны вакуум. Учора я прыехаў на Акрэсціна, прадставіўся, папрасіў наведаць свайго падабароннага.
Дзяжурны адказаў мне, што гэта можна зрабіць толькі з дазволу следчага. Я ўдакладніў, за кім замацаны Мацкевіч. Мне адказалі: за Следчым камітэтам па Менску. Праз некалькі гадзін я адвёз туды апавяшчэнне аб прыняцці абароны.
Сёння раніцай я зноў прыехаў у СК, але ў іх адбывалася «мерапрыемства па ўручэнні пасведчанняў». Пакуль што мне не ўдалося наведаць Уладзіміра, але мяркую, што 4 жніўня з ім праводзіліся нейкія следчыя дзеянні. Дапускаю, з парушэннямі, бо ён ведаў пра наяўнасць у яго адваката. Сёння буду яшчэ раз спрабаваць сустрэцца з ім».
Разам з тым Дзмітрый Лазавік не выключае, што для грамадскасці сітуацыя з затрыманнем Уладзіміра Мацкевіча можа не праясніцца і ў пятніцу: «З мяне могуць узяць падпіску аб невыдаванні даных папярэдняга следства, аж да сутнасці прад’яўленых абвінавачванняў і канкрэтных артыкулаў КК», — канстатаваў адвакат у каментары thinktanks.by.
