ДАІ рэкамендуе ўлічваць эпідэміялагічную сітуацыю пры наведванні могілак на Радуніцу
Дзяржаўная аўтаінспекцыя не прапануе адмовіцца ад традыцыі, але просіць па магчымасці наведаць могілкі не ў самы пік адзначэння Радуніцы, магчыма, паехаць да спачылых блізкіх будзе лепш не на саму Радуніцу 28 красавіка, а ў адзін з чатырох выходных, што пачынаюцца з 25 красавіка.
Пра гэта на прэс-канферэнцыі ў Менску сказаў намеснік кіраўніка ўпраўлення дарожна-патрульнай службы і прафілактыкі Дзяржаўтаінспекцыі, міліцыі і грамадскай бяспекі МУС Беларусі Дзяніс Стаўскі.
– Усе нашыя намаганні будуць накіраваныя ў першую чаргу на забеспячэнне бяспекі дарожнага руху, асабліва мясцін пахаванняў. Мы рэкамендуем нашым грамадзянам, з улікам сітуацыі, выбіраць пэўныя дні для наведвання могілкаў, для ўпарадквання магіл, абмежаваць свае зносіны са сваякамі сталага ўзросту.
Паводле Дзяніса Стаўскага, усе схемы арганізацыі дарожнага руху на вялікіх выходных і змены ў іх будуць размешчаныя на сайце Міністэрства ўнутраных спраў mvd.gov.by.
Беларускае Радыё Рацыя
