Далучайцеся да акцыі «Гарады супраць смяротнага пакарання»!
Праваабаронцы заклікаюць далучыцца да акцыі «Гарады за жыццё – гарады супраць смяротнага пакарання», якая ладзіцца 30 лістапада.
Ініцыятарам акцыі з’яўляецца італьянская «Абшчына Святога Эгідзія».
30 лістапада ў 1786 годзе ў італьянскім княстве Таскана ўпершыню ў гісторыі еўрапейскіх дзяржаваў было адмененае смяротнае пакаранне.
Як паведаміў каардынатар кампаніі “Праваабаронцы супраць смяротнага пакарання” Андрэй Палуда:
– І ў Беларусі праваабаронцы ды грамадскія актывісты 30 лістапада далучацца да гэтай ініцыятывы з надзеяй на тое, што беларускае грамадства зверне ўвагу на неабходнасць адмены гэтага віду пакарання. Упершыню ў Беларусі такая акцыя была праведзеная ў межах кампаніі супраць смяротнага пакарання ў 2010 годзе. Адбылося гэта каля Чырвонага касцёлу ў Менску. Спадзяемся, што ў гэтым годзе праз сацыяльныя сеткі да нас далучыцца яшчэ больш людзей.
Традыцыйна акцыя ладзіцца ў тых краінах, дзе смяротнае пакаранне ўжо не выкарыстоўваецца. У гарадах без смяротнага пакарання ўвечары 30-га лістападу асвятляюць касцёлы, архітэктурныя помнікі і плошчы. Робяць гэта ў падтрымку права на жыццё.
Каб далучыца да акцыі «Гарады за жыццё – гарады супраць смяротнага пакарання», кожны ахвотны можа:
- Зрабіць сэлфі ў сваім горадзе на фоне вядомага будынка, выкласці гэтае фота ў любой сацыяльнай сетцы з хэштэгам #citiesforlife #ЗаЖыццё
- Спампаваць і апублікаваць у сацыяльных сетках лагатып кампаніі з хэштэгам #citiesforlife #ЗаЖыццё
- Перайсці па спасылцы і паставіць сабе на фота ў Фэйсбуку “picbadges”
- Спампаваць і раздрукаваць малюнкі, зрабіць з імі фотаздымкі і выкласці іх у свае сацыяльныя сеткі з хэштэгам #citiesforlife #ЗаЖыццё
- Падпісаць Петыцыю супраць смяротнага пакарання ў Беларусі
Беларускае Радыё Рацыя
Глядзіце таксама
