Дэсантнікі Беларусі і Расеі правядуць супольныя манеўры
Дэсантнікі Расеі і Беларусі на працягу месяца правядуць двое буйных сумесных тактычных манеўраў з дэсантаваннем і баявой стральбой, паведамляе ў аўторак Мінабароны РФ.
„Манеўры будуць праводзіцца на тэрыторыі дзвюх краін. Усяго ў іх будзе задзейнічана больш за 1,2 тысячы чалавек асабовага складу і 100 адзінак вайсковай і спецыяльнай тэхнікі”, – гаворыцца ў рэлізе.
Абодва вучэнні будуць праходзіць у адпаведнасці з планам міжнароднай дзейнасці МА РФ на 2016 год.
У Мінабароны РФ паведамілі, што падчас вучэнняў дэсантнікі дзвюх краін адпрацуюць практычныя пытанні па абароне межаў Саюзнай дзяржавы, барацьбе з незаконнымі ўзброенымі фарміраваннямі і розныя тактычныя задачы.
У 2016 годзе, у параўнанні з папярэднім годам, колькасць сумесных вучэнняў расейскіх дэсантнікаў і сіл спецыяльных аперацый Узброеных сіл Беларусі павялічылася на траціну – да 38, сказалі ў вайсковым ведамстве РФ.
