Два гады „хіміі” за абразу аршанскага даішніка
У Воршы вынесены прысуд Сяргею Парфяненкаву, якога абвінавацілі ў абразе прадстаўніка ўлады па артыкуле 369 Крымінальнага кодэкса. Справу разглядаў суддзя Дзмітрый Разумовіч. Да суда Сяргей Парфянкоў знаходзіўся пад падпіскай аб нявыездзе. Жыхара Воршы абвінавацілі ў тым, што ён са свайго акаўнта ў сацыяльнай сетцы “Аднакласнікі” ў суполцы „Усатый таракан” пакінуў каментар пра супрацоўніка ДАІ, які спыняў і штрафаваў аршанскіх актывістаў. У прыватнасці, ён дапусціў у каментарах слова „мразь” і некалькі іншых слоў на мяжы цэнзурнасці.
У судовым пасяджэнні 27 снежня Сяргей стаў адмаўляць, што пісаў менавіта ён. Бо дакладна не памятае – даўно было. Казаў пра тое, што з яго акаўнта мог напісаць і нехта іншы. Пра прынцыповасць пацярпелага супрацоўніка ДАІ ў Воршы вядома, што аднойчы ён нават роднага бацьку пазбавіў права кіравання аўтамабілем і аштрафаваў. Суд прызнаў Парфяненкава вінаватым і прызначыў пакаранне ў выглядзе абмежавання волі з накіраваннем ва ўстанову адкрытага тыпу тэрмінам на два гады. У якасці матэрыяльнай кампенсацыі маральнай школы ён павінен выплаціць супрацоўніку ДАІ 1750 рублёў. Сяргей Парфяненкаў мае намер абскардзіць судовы вырак.
