Дваровы марш у Малінаўцы скончыўся затрыманнямі
Затрыманых учора падчас дваровых маршаў судзяцць сёння ў трох судах Менска, паведамляюць праваабаронцы.
Увечары 22 красавіка на праспекце Любімава і вуліцы Бялецкага адбыліся масавыя затрыманні. З’явіліся відэа, на якіх бачна, што ўдзельнікаў маршу паклалі тварам на зямлю.
У РУУСах на менчукоў склалі пратаколы па арт. 24.23 КаАП за ўдзел у несанкцыянаваным масавым мерапрыемстве, а на некаторых яшчэ і за непадпарадкаванне па арт. 24.3 КаАП. Па пратаколу, яны крычалі: „Жыве Беларусь”, свяцілі ліхтарыкамі і шлі ў групе асобаў з БЧБ-сцягамі.
Пакуль праваабаронцам вядомыя вынікі судоў над шасцю затрыманымі. Суддзя Кастрычніцкага раёна Жывіца адправіла на 15 сутак Ірыну Семашчук, а суд Маскоўскага раёна таксама пакараў Юлію Кулеш, Дзмітрыя Мацкевіча і Уладзіслава Галкіна 15-сутачнымі арыштамі. Галіна Вянцкевіч і Яўген Жук таксама пазбаўленыя волі суддзёй Фрунзенскага раёна Марыяй Ярохінай на 15 сутак.
Суды над астатнімі затрыманымі цяпер праходзяць у трох судах Менска.
