Дзе палітвязень Міхаіл Жамчужны – невядома
Праваабаронца Таццяна Рэвяка атрымала ад палітвязня Міхаіла Жамчужнага ліст без зваротнага адрасу, на канверце прастаўлены штэмпель “Брэсцкая вобласць, г. Баранавічы, СІЗА-6”. У лісце Міхаіл нічога не піша пра знаходжанне ў следчым ізалятары Баранавічаў, са зместу хутчэй вынікае, што ён знаходзіцца ў Жодзіне.
Ліст ад Жамчужнага не датаваны (чаго не было раней), але зразумела, што ён напісаны прыкладна ў дні, калі ў Барысаўскім раённым судзе разглядалася прадстаўленне адміністрацыі калоніі ў Навасадах, дзе да гэтага адбываў пакаранне палітвязень, пра перавод яго на турэмны рэжым утрымання. Нагадваем, 21 красавіка, справа была спыненая ў сувязі з тым, што адміністрацыя адклікала напярэдадні судовага паседжання сваё прадстаўленне.
Міхаіл Жамчужны піша: “18 красавіка сталыпіным завезлі на Жодзіна, 20 красавіка – у ІЧУ Барысава. 21 красавіка ў 10.00 факсам з суда прыйшло паведамленне, што ў 14.10 будзе слухацца яшчэ адна справа па ШЫЗА, апошняя, якую я абскарджваў. Гэта я да таго паведамляю, што суд цудоўна ведаў, што я знаходжуся ў ІЧУ, але не ўведаміў мяне пра прычыны адмены суда па 3-гадовым накіраванні на турэмны рэжым. Па ўсім відаць, яны самі не ведалі, што адбылося. За мной заехаў персанальны аўтазак, ні слова не кажучы, сабралі з рэчамі і завезлі ў Жодзіна замест суда. Я быў скрайне здзіўлены…
Па Жодзіне я яшчэ болей здзівіўся. Да мяне адміністрацыя ставілася так, нібыта я туды вярнуўся па асабістым распараджэнні Лукашэнкі. Хто мяне не ведаў, пыталіся: “Хто я такі?”, а хто ведаў: “Што здарылася?”. Дабіла мяне тое, што тут жа ўручылі сумку, якую я пакінуў на ВК-14 у Навасадах з рэчамі 50 кг вагой у надзеі, што вярнуся туды. Пра яе ведалі пару чалавек з ВК, і тое, што яе аператыўна даставілі ў Жодзіна, казала пра сур’ёзную прапрацоўку не зразумелай да гэтага часу працэдуры”.
Таццяна Рэвяка патэлефанавала ў калонію ў Навасадах, дзе ёй пацвердзілі, што Міхаіла Жамчужнага ў іх няма. Дзе зараз знаходзіцца палітвязень – невядома. Гэтае пытанне высвятляе адвакат.
Паводле spring96.org
