Дзеці з Гародні кажуць пра анкалогію па-беларуску
Гарадзенскі дзіцячы хоспіс прадставіў сацыяльны ролік на тэму анкалогіі па-беларуску.
Беларускамоўны ролік зроблены ў межах акцыі “З верай у добрыя справы і людзей” пры падтрымцы гарадзенскай дзіцячай паліклінікі №2. Яго галоўнымі героямі з’яўляюцца дзеці, якія расказваюць простымі словамі пра вельмі сур’езныя рэчы. Маленькія акторы патрацілі больш за тры гадзіны свайго дзіцячага часу дзеля адной мэты – зрабіць кожнага з нас больш граматнымі ў тэме развіцця анкалогіі і яе прафілактыкі.
Пра ролік распавядае дырэктарка гарадзенскага дзіцячага хоспісу Вольга Шульга:
– Мы паспрабавалі простымі словамі расказаць пра вельмі складаныя рэчы. Пра тое, што анкалогія можа кантралявацца, і кожны з нас здольны ўплываць на сваё здароўе. Як бы мы не спадзяваліся на медыцыну і дактароў, усё ж такі першае – гэта наша свядомасць. Развіццё анкалогіі перш за ўсё залежыць не ад медыцыны, не ад дактароў, а ад саміх нас, ад таго ладу жыцця, якімы вядзём.
Над ролікам працамілі фатограф Ягор Чупракоў, а відэа здымала Інга Сакута са студыі “Сакавіта”.
Стварэнне роліка прымеркавана да дзьвух датаў : 4 лютага – Міжнародны дзень барацьбы супраць рака, а 15 лютага – Міжнародны дзень дзяцей, якія хварэюць на анкалогію.
Гэта ўжо другі ролік, зроблены Гарадзенскім дзіцячым хоспісам. Папярэдні транслюецца на вялікім экране ў цэнтры Гародні, на экранах у грамадскім транспарце, а таксама па гарадзенскім тэлебачанні.
Беларускае Радыё Рацыя, Гародня
