Дзіцячы хоспіс ладзіць “Лета добрых справаў”
З пачатку лета ў Гародні распачалася акцыя “Лета добрых справаў”, якую ладзіць гарадзенскі дзіцячы хоспіс. У межах гэтай акцыі ўжо працуе тэлефонная лінія па зборы сродкаў для цяжка і безнадзейна хворых дзетак, а некалькі дзён таму запрацавала яшчэ адна ініцыятыва. Яна мае назву “Адзінка, што ратуе жыццё”.
Пра ініцыятыву распавядае дырэктарка гарадзенскага дзіцячага хоспіса Вольга Шульга:
– Цягам гэтых трох месяцаў мы хацелі б зрабіць пасыл грамадству пад назвай “Адзінка, што ратуе жыццё”. Мы выбралі 5 крамаў і прадпрыемстваў, калі вы туды прыходзіце і набываеце тавар ці паслугу, то 1% ад набытага вамі ідзе на патрэбу цяжка і невылечна хворых дзяцей.
Гарадзенскі дзіцячы хоспіс аказвае гуманітарную дапамогу дзецям з цяжкімі парушэннямі і з абмежаваным тэрмінам жыцця, сярод якіх 40 дзетак – з анкалагічнымі захворваннямі. А сярод крамаў і прадпрыемстваў гораду, праз якія можна дапамагчы дзеткам, – аўтамыйка і кампутарная крама, крама настольных гульняў, адна з гарадзенскіх кнігарняў.
Беларускае Радыё Рацыя, Гародня
Фота Віталя Дзернейкі
Глядзіце таксама
