Дзмітрый Паліенка трымае галадоўку на Акрэсціна
Жыццё і здароўе анархіста Дзмітрыя Паліенкі знаходзяцца ў небяспецы, заявіла яго жонка ў відэазвароце ў сацыяльнай сетцы „Фэйсбук”.
„Днямі” Анастасія Паліенка даведалася, што яго арыштавалі ў агульнай складанасці на 45 сутак, пры гэтым „ніякіх матэрыялаў справы па месцы пражывання не прыходзіла”. „Мы не ведаем, за што яму далі гэтыя суткі”, — сказала жонка анархіста. Яна адзначыла, што да арышту Паліенка знаходзіўся на хатняй „хіміі”.
Паводле слоў Анастасіі Паліенкі, Дзмітрый знаходзіцца ў адзіночнай камеры ў цэнтры ізаляцыі правапарушальнікаў на Акрэсціна і ўжо 15 сутак трымае галадоўку. Ён просіць выклікаць хуткую дапамогу, але мясцовы ўрач пасля вымярэння ціску і тэмпературы заявіў, што ўсё ў парадку. Каб выклікалі хуткую, Паліенка рабіў спробы „нашкодзіць сабе”.
Анастасія паведаміла, што атрымлівае інфармацыю пра мужа толькі ад тых, хто выходзіць з ЦІП. Ні яна, ні адвакат не могуць атрымаць яе афіцыйным шляхам.
8 ліпеня суд Першамайскага раёна Менска арыштаваў Паліенку на 15 сутак за ўдзел у несанкцыянаваным масавым мерапрыемстве. Прычынай прыцягнення да адказнасці стала фатаграфія з каструляй, якую ён выклаў у сацыяльных сетках. Сведка — супрацоўнік Першамайскага РУУС — нібыта ўбачыў пост на старонцы Паліенкі з заклікам да ўдзелу ў флэшмобе.
25 кастрычніка 2019 года Менскі гарадскі суд прызнаў Паліенку вінаватым у асабліва злосным хуліганстве (ч. 3 арт. 339 КК) і прыгаварыў да трох гадоў абмежавання волі без накіравання ў папраўчую ўстанову. Па амністыі 2019 года пакаранне скарацілася на год. Паліенку таксама прызначылі прымусовае лячэнне ад алкагалізму. 14 лютага гэтага года Вярхоўны суд пакінуў прыгавор у сіле.
Фота: ПЦ Ц”Вясна”
Глядзіце таксама
