Дзмітрыю Паліенку выстаўленае абвінавачанне
Затрыманаму 20 сакавіка анархісту Дзмітрыю Паліенку выстаўленае абвінавачанне на падставе некалькіх артыкулаў Крымінальнага кодэкса, паведаміла БелаПАН афіцыйны прадстаўнік Следчага камітэта Юлія Ганчарова.
„Выстаўленае абвінавачванне ва ўчыненні некалькіх злачынстваў. Гэта — асабліва злоснае хуліганства (ч. 3 арт. 339), распальванне іншай сацыяльнай варожасці (арт. 130), а таксама апаганьванне збудаванняў і псаванне маёмасці (арт. 341), — сказала Ганчарова. — Усе эпізоды супрацьпраўнай дзейнасці, якія ў цяперашні час ўстаноўленыя ў дачыненні да яго, злучаныя ў адной вытворчасці. Працягваецца расследаванне”.
Паводле слоў прадстаўніка СК, меру стрымання Паліенку не змянялі — ён працягвае заставацца пад вартай. „У дачыненні да абвінавачанага прызначаная стацыянарная судова-псіхолага-псіхіятрычная экспертыза”, — сказала Ганчарова.
Раней яна паведамляла, што, паводле дадзеных следства, 13 сакавіка прыблізна ў 20 гадзін „на лесвічнай пляцоўцы аднаго з дамоў па вуліцы Гурскага ў Менску неўстаноўленая асоба ў адказ на заўвагу мужчыны пра курэнне ў пад’ездзе пырснула яму ў твар газ з газавага балончыка”. Супрацоўнікамі міліцыі падчас аператыўна-вышуковых мерапрыемстваў паводле падазрэння ва ўчыненні злачынства 20 сакавіка быў затрыманы Дзмітрый Паліенка.
27 сакавіка сяброўка Паліенкі Анастасія Гусева паведаміла БелаПАН, што 24 сакавіка Паліенка абвясціў галадоўку. Паводле яе слоў, гэтую інфармацыю яна атрымала ад адваката, якая наведвала затрыманага.
Гусева адзначыла, што прычынай галадоўкі стала неаказанне Паліенку медыцынскай дапамогі, а таксама адсутнасць магчымасці пісаць лісты сябрам і скаргі па сваёй справе. „У Дзімы праблемы са здароўем — у яго дэрматыт, астма. У яго пачаўся атыт, бо ў дзень, калі яго затрымалі, ён доўга знаходзіўся на вуліцы. У яго вялікія праблемы са здароўем, але ніякай медыцынскай дапамогі яму не аказваюць. Яму патрэбная спецыяльная мазь, але з перадачай у нас лекі не прынялі, — сказала Гусева. — Я таксама перадавала яму аркушы паперы, канверты і ручкі, каб ён мог пісаць лісты, але сказалі, што ручкі ў камеру не прымаюць і будуць яму выдаваць толькі на яго патрабаванне. Але Дзмітрый кажа, што ручкі яму не даюць, таму ён не мае магчымасці пісаць скаргі ці адказваць на лісты”.
У сваю чаргу Ганчарова паведаміла БелаПАН, што, паводле яе звестак, галадоўку Паліенка не абвяшчаў.
Паводле інфармацыі Гусевай, актывіст спыніў галадоўку, бо яму перадалі лекі.
Дзмітрый Паліенка 24 кастрычніка 2018 года быў вызвалены з бабруйскай папраўчай калоніі № 2. Крымінальную справу ў дачыненні да яго распачалі пасля велапрабегу „Крытычная маса” ў красавіку 2016 года ў Мінску. 12 кастрычніка 2016 года суд прызнаў яго вінаватым у „насіллі або пагрозе насілля ў дачыненні да супрацоўніка праваахоўных органаў” — маладога чалавека абвінавацілі ў тым, што ён парваў куртку міліцыянеру. Беларускія праваабаронцы прызналі Паліенку палітвязнем.
У канцы мінулага года ў дачыненні да Паліенкі быў складзены пратакол на падставе арт. 17.11 КоАП (выраб, распаўсюджванне і (або) захоўванне экстрэмісцкіх матэрыялаў). Падставай для адміністратыўнага пераследу з’явіўся пост у „Фэйсбуку” з выявай маладога чалавека, на вопратцы якога быў надпіс, унесены ў рэспубліканскі спіс экстрэмісцкіх матэрыялаў. 31 студзеня 2019 года Паліенка быў пакараны штрафам у 1.275 рублёў за „распаўсюджванне экстрэмісцкіх матэрыялаў”.
23 студзеня СК распачаў крымінальную справу за нанясенне графіці на адзін з будынкаў на вуліцы Ахоцкай у Заводскім раёне Мінска. Фігурантамі гэтай справы акрамя Паліенкі з’яўляюцца Яўген Чуліцкі і Анастасія Гусева.
