Дзятлаўчане збіраюць подпісы, каб ушанаваць свайго земляка
У Дзятлаве ідзе збор подпісаў сярод гараджан, каб вуліцу Будаўнікоў перайменаваць у вуліцу іх выдатнага земляка, будаўніка па прафесіі Пятра Гроса.
Пятра Гроса не стала раптоўна сёлета летам. Яму было толькі 59 гадоў. Па словах дзятлаўскага грамадскага актывіста Валерыя Петрыкевіча, Пётр Грос нарадзіўся і вырас у Дзятлаве, тут скончыў школу і стварыў сям’ю. Сюды, пасля набыцця прафесіі будаўніка, ён прыехаў працаваць у мясцовую МПМК-147. Майстар, прараб, галоўны інжынер, кіраўнік арганізацыі – такі яго быў хуткі кар’ерны ўзлёт. Гэтаму спрыяла яго адданасць працы, дасведчанасць, справядлівасць. Пры яго непасрэдным удзеле і пад яго кіраўніцтвам у Дзятлаве былі пабудаваны знакавыя будынкі: раённая бальніца, паліклініка, школа № 3, будынкі МПМК, новы мікрараён. Гэта пры непасрэдным удзеле Пятра Гроса Дзятлава ператварылася з мястэчка ў прыгожы горад. Пятро Грос, па словах былога дырэктара Дзятлаўскага музея Фёдара Красюка, быў шчырым беларусам, заўсёды падтрымліваў добрыя справы землякоў, дапамагаў словам і справай, марыў, каб на Дзятлаўшчыне былі ўшанаваны ўсе знакамітыя дзятлаўчане.
Сёння ў Дзятлаве шмат вуліц з назвамі камуністычнага мінулага: Савецкая, Леніна, Кастрычніцкая, Чырвонаармейская, Кірава, Цэткін, Камсамольская і вуліц, якія носяць імёны камандзіраў партызанскіх атрадаў і іншых асобаў, якія ніякага дачынення да Дзятлава не маюць. Таму мясцовыя грамадскія актывісты вырашылі, што адну з вуліц Дзятлава, а менавіта вуліцу Будаўнікоў, неабходна перайменаваць у вуліцу іх земляка Пятра Гроса. Цяпер у Дзятлаве актыўна ідзе збор подпісаў пад зваротам у Дзятлаўскі райвыканкам, каб вуліцу Будаўнікоў перайменаваць у вуліцу Пятра Гроса. Ужо сабрана больш за 150 подпісаў. Збор подпісаў працягваецца.
Беларускае Радыё Рацыя, Дзятлава
