Дзяўчыну адлічылі з каледжа за падтрымку віцебскіх студэнтаў-медыкаў
У Віцебску адлічылі з каледжа першакурсніцу Сафію Цярэнцьеву: дзяўчына выйшла ў фае сваёй навучальнай установы з плакатам на падтрымку затрыманых студэнтаў медычнага ўніверсітэта.
У яе ў руках быў плакат з фотаздымкам брутальнага затрымання студэнтаў-медыкаў, якія тры дні таму падтрымалі агульнабеларускі страйк у сваёй ВНУ.
18-гадовая Сафія Цярэнцьева неаднаразова ўдзельнічала ў мірных пратэстах, яе двойчы арыштоўвалі і судзілі. 29-га кастрычніка дзяўчына выйшла на адзіночны пікет у фае каледжа, з якога яе ўжо адлічылі. Адміністрацыя выклікала міліцыю, і дзяўчыну чарговы раз павезлі складаць пратакол у пастарунак. Зараз яна знаходзіцца пад вартай.
Чацьвярых студэнтаў-медыкаў, якіх падтрымала Сафія, з мінулага панядзелка трымалі за кратамі, а сення асудзілі да штрафаў – за сход у фае ВНУ і спевы каля фантана ў двары. Штрафы суд Кастрычніцкага раёну прысудзіў параўнальна невялікія – ад адной да трох базавых велічынь ( ад 27-мі да 81-го рубля). Але розгалас пра затрыманне дзвюх дзяўчат і дваіх хлопцаў прайшоў па ўсім горадзе. У падтрымку студэнтаў на ланцуг салідарнасці сёння выходзілі і іхныя старэйшыя калегі – лекары віцебскага абласнога шпіталя.
Беларускае Радыё Рацыя, Віцебск
