Экс-палітвязня аштрафавалі за адмову хадзіць на прафілактычныя лекцыі
У судзе Заводскага раёна Менска 14 снежня адбылося судовае паседжанне ў дачыненні да былога палітвязня Змітра Паліенкі. Яго прызналі вінаватым у парушэнні артыкула 23.4 КаАП (непадпарадкаванне законнаму патрабаванню супрацоўнікаў міліцыі) і прызначылі штраф у памеры 40 базавых велічынь. Рашэнне вынесла суддзя Настасся Асіпчык.
Гэта яго першае адміністрацыйнае спагнанне пасля вызвалення з Бабруйскай калоніі напрыканцы лістапада. Зміцер Паліенка вырашыў адмовіцца хадзіць на прафілактычныя лекцыі ў міліцыю, якія праходзяць амаль кожны дзень. Гэта і стала падставай для адміністрацыйнага пераследу.
Першае паседжанне па гэтай адміністрацыйнай справе павінна было прайсці 6 снежня, аднак яно так і не адбылося, бо суд адправіў справу на дапрацоўку. І вось увечары 12 снежня стала вядома, што пратакол усё ж дапрацавалі, а на наступны дзень Паліенка мусіць з’явіцца ў мясцовы РУУС. У РУУС ён з’явіўся, але суда тады так і не адбылося. Актывісту выдалі позву на наступны дзень, але на гэты раз ён адмовіўся ісці ў пастарунак. У выніку раніцай 14 снежня супрацоўнікі ў цывільным прыехалі дамоў да Паліенкі і адвезлі яго ў суд.
На сённяшні дзень за адмову хадзіць на прафілактычныя лекцыі ў РУУС на актывіста складзена тры адміністрацыйныя пратаколы. Вядома, што яшчэ адно судовае паседжанне па адным з пратаколаў прызначана на 19 снежня.
Нагадаем, што Зміцер Паліенка выйшаў на волю больш за месяц таму і павінен быў амаль штодзень з’яўляцца ў Заводскі РУУС, каб слухаць лекцыі, якія тычыліся працаўладкавання. Некалькі разоў хлопец наведаўся на іх, але затым адмовіўся гэта рабіць прынцыпова. Ён звярнуўся ў пракуратуру, каб тая правяла праверку законнасці дзеянняў міліцыянтаў Заводскага РУУС, паколькі, на яго думку, штодзённыя паходы ў пастарунак значна абмяжоўваюць яго права на свабоднае перамяшчэнне і забіраюць даволі шмат часу. Пракуратура па традыцыі перанакіравала яго скаргу ў сам Заводскі РУУС, які канешне ж не знайшоў парушэнняў у дзеяннях сваёй жа ўстановы. Зараз Паліенка з дапамогай праваабаронцаў абскарджвае гэты адказ у ГУУС Менгарвыканкама.
Рэч у тым, што ў заканадаўстве прапісана, што прафілактычныя мерапрыемствы мусяць праходзіць раз на месяц, калі іншая перыядычнасць не вызначана кіраўніцтвам суб’екта прафілактыкі. І атрымліваецца, што кіраўніцтва Заводскага РУУС пайшло другім шляхам і вызначыла перыядычнасць для такіх мерапрыемстваў – кожны дзень. Пры гэтым яны ніяк не абгрунтавалі, на падставе чаго абрана менавіта такая перыядычнасць.
Глядзіце таксама
