Філатэлісты з Гарадзеншчыны атрымалі польскія ўзнагароды
Філатэлісты Лявон Карповіч, Сяргей Печарыца і Андрэй Мялешка атрымалі „Бронзавыя знакі гонару” „Польскага саюза філатэлістаў”. Узнагароды нададзеныя за ўзмацненне сувязяў паміж філатэлістычнымі арганізацыямі Польшчы і Беларусі.
Як зазначае старшыня гарадзенскай суполкі „Беларускага саюза філатэлістаў” Андрэй Мялешка, гэтыя адзнакі – даніна павагі за тую працу, якая ажыццяўляецца філатэлістамі Гарадзеншчыны ў шчыльнай супрацы са сваімі польскімі калегамі:
– Беларусы праз „Польскі саюз філатэлістаў” могуць прыняць удзел у міжнародных выставах: у Лондане, у Сінгапуры ды іншых краінах свету. Да гэтага такога не было да 2016 года. Мы раней не мелі магчымасці выстаўляцца як філатэлісты, як удзельнікі выстаў, а зараз ёсць такая магчымасць праз „Польскі саюз філатэлістаў”.
Да гэтага часу падобную ўзнагароду ў Беларусі атрымаў толькі адзін чалавек. Вядомы гарадзенскі філатэліст Фрэдэрык Гушча 20 гадоў таму быў адзначаны „Бронзавым знакам гонару”. На той момант ён быў сябрам беластоцкага аддзялення „Польскага саюза філатэлістаў”.
Беларускае Радыё Рацыя, Гародня
