Галадоўка пратэсту ў Магілёве
У Магілёве працягваюць галадоўку шасцёра жыхароў дома па вуліцы Ленінскай, 59, якія патрабуюць даць ім асобнае жыллё. Акцыя пратэсту пачалася 18 траўня.
Яе ўдзельнікі даказваюць, што жылі ў жылым доме, а не ў інтэрнаце, адкуль па прычыне драхласці будынка былі пераселены ў інтэрнат па вуліцы Піянерскай. Пра гэта гаворыцца і ў іх ордэрах, выдадзеных у 1970-я гады – што кватэры яны атрымалі менавіта ў шматкватэрным жылым доме. Аднак у гарадскіх уладаў іншае меркаванне – яны сцвярджаюць, што састарэлы дом быў інтэрнатам, а таму асобныя кватэры жыхарам не належаць. Гэтую пазіцыю падзяляе і абласная пракуратура, куды звярнуліся грамадзяне. Выселеныя людзі заяўляюць аб падлогу дакументаў і ігнараванне іх правоў.
19 траўня да галадоўнікаў прыязджала хуткая дапамога. Што тычыцца ўладаў горада, яны пакуль ніяк не адрэагавалі на акцыю людзей, якія знаходзяцца ў роспачы.
Беларускае Радыё Рацыя
Фота з сайту realt.onliner.by
Глядзіце таксама
