Гарадзеншчына – эксперыментальная пляцоўка для закона “Аб дармаедах”
Згодна з пастановай беларускага ўрада, на Гарадзеншчыне цягам шасці месяцаў у эксперыментальным парадку ўводзіцца ў дзеянне закон “Аб стымуляванні занятасці грамадзянаў”, які ў народзе атрымаў назву закон “Аб дармаедах”. Калі цягам гэтага часу эксперымент дасць станоўчыя вынікі, закон будзе ўведзены на тэрыторыі ўсёй краіны. Прыпамежная Гарадзеншчына не выпадкова абраная месцам правядзення эксперыменту: тут назіраецца адзін з самых высокіх узроўняў беспрацоўя па краіне. Аднак, як лічыць намеснік начальніка ўпраўлення па працы, занятасці і сацыяльнай абароне Гарадзенскага гарвыканкама Жанна Краўцова, працоўных месцаў на ўсіх наўрад ці хопіць:
– Будзе павелічэнне рэгістрацыі асобаў як беспрацоўных. Выйдуць на рынак доўгі час непрацуючыя грамадзяне. Можна сказаць, што беспрацоўныя – гэта тавар. І як ён сябе прыпаднясе прадаўцу, наймальніку, такі будзе і вынік. А дасведчаны наймальнік бачыць, хто перад ім: ініцыятыўны працаўнік ці пасіўны. Таму многае залежыць ад самога чалавека.
Дзеянні закону “Аб спагнанні падатку з дармаедаў” закрануць перад усім непрацуючых жыхароў Гарадзеншчыны, якія будуць узятыя на спецыяльны ўлік у падатковых інспекцыях па месцы жыхарства. Кожны з непрацуючых павінен будзе выплаціць дзяржаве штомесячную грашовую кампенсацыю памерам 360 000 рублёў.
Беларускае Радыё Рацыя, Гародня
Фота www.kp.by
Глядзіце таксама
