Гарадзеншчына пашырае супрацоўніцтва з ААН (абноўлена)
Гародня стала першым горадам Беларусі, які наведаў спецыяльны цягнік Арганізацыі Аб’яднаных Нацый.
Мерапрыемства прымеркавана да 70-й гадавіны ўплывовай міжнароднай арганізацыі. На цягніку ў горад над Нёманам прыехалі прадстаўнікі ААН, дыпламаты, беларускія парламентарыі і грамадскія дзеячы, якія на працягу дня прымуць удзел у шэрагу сустрэчаў, дыскусій, канцэртаў, выставаў і паказах фільмаў.
Як зазначае старшыня Гарадзенскага абласнога выканаўчага камітэта Уладзімір Краўцоў, Гародня не выпадкова стала першым горадам, які сустрэў экспрэс ААН:
– Гэта гістарычны цэнтр нашай краіны, і у нас рэалізуецца нямала праграм міжнароднага характару, у некаторых мы першапраходцы і напэўна гэта прызнанне.
Намеснік рэгіянальнага дырэктара Фонду народанасельніцтва ААН у Еўропе і Цэнтральнай Азіі Карэн Дадуран:
– Мэта гэтай паездкі інфармаваць насельніцтва ў першую чаргу пра тыя мэты, якія мы будзем імкнуцца сумесна з урадамі ўсіх краін ажыццяўляць на працягу бліжэйшых 15 гадоў.
Галоўны равін рэлігійнага аб’яднання абшчын прагрэсіўнага іўдаізму Рыгор Абрамовіч:
– Цягнік – гэта працяг нашага дыялогу, нашай размовы. У цягніку абмяркоўваецца 17 мэтаў, да якіх мы павінны прыйсці разам з дапамогай ААН.
У межах святкавання 70-й гадавіны ААН у Гародні адбудзецца маштабная акцыя, прысвечаная здароваму ладу жыцця. Удзел у ёй прымуць вядомыя беларускія спартоўцы – чэмпіёны Еўропы, свету і алімпійскіх гульняў.
[Not a valid template]
Была падпісана дэкларацыя прыхільнасці рэгіёна мэтам устойлівага развіцця.
Дакумент замацавалі подпісамі старшыня Гарадзенскага абласнога выканаўчага камітэта Уладзімір Краўцоў і прадстаўнікі ААН, якія наведваюць горад у межах святкавання 70-й гадавіны заснавання арганізацыі.
Як зазначыў губернатар Гарадзенскай вобласці Уладзімір Краўцоў, дакумент пашырае магчымасці супрацоўніцтва з ААН на рэгіянальным узроўні:
– Я спадзяюся, што гэта дазволіць нам, гарадзенцам лепш зразумець, чым займаецца Арганізацыя Аб’яднаных Нацый і яе партнёры.
Намеснік рэгіянальнага дырэктара Фонду народанасельніцтва ААН у Еўропе і Цэнтральнай Азіі Карэн Дадуран:
– Супрацоўнічаем у такіх галінах, як здароўе, адукацыя, сацыяльнае забеспячэнне, пытанні распрацоўкі палітыкі ў галіне дэмаграфіі і палітыкі па народанасельніцтву.
Каардынацыйны камітэт па ўзаемадзеянні з глабальным фондам Ганна Ткачова:
– Праграмы дазволяць канкрэтна абазначыць тое, на што нам зараз неабходны грошы.
Гарадзенская вобласць рэалізуе супольныя праекты з Арганізацыяй Аб’яднаных Нацый у такіх накірунках дзейнасці, як ахова здароўя і падтрымка здаровага ладу жыцця, дапамога інвалідам і прадухіленне ВІЧ – інфекцый насельніцтва. За сродкі ААН набываюцца таксама медыкаменты для лячэння нарказалежных людзей.
Беларускае Радыё Рацыя, Гародня
