Гарадзенцы ўзгадваюць Плошчу-2006 (абноўлена)
Мінула 10 гадоў з акцыі пратэсту на Кастрычніцкай плошчы Менску ў знак нязгоды з фальшаваннем прэзідэнцкіх выбараў 19 сакавіка 2006 года. Гэта была самая масавая і працяглая акцыя пратэсту ў гісторыі Беларусі. Яна адбывалася з 19 па 24 сакавіка 2006 года.
Пра тое, што адбывалася 10 год таму ў Менску і Гародні, распавядаюць грамадскія актывісты.
Кажа старшыня гарадзенскай абласной арганізацыі Партыі БНФ Вадзім Саранчукоў:
– Ад 2006 года даволі пазітыўныя ўспаміны. Мы між сабой нават часам жартуем. Напрыклад, я ведаю дакладна ўчастак, дзе за Аляксандра Мілінкевіча прагаласавала 100% выбарцаў. Гэты ўчастак быў у Кастрычніцкім РАУСе, дзе напярэдадні вызвалілі з камер усіх адміністрацыйна затрыманых. Увесь пастарунак быў запоўнены сябрамі каманды. Таму можна гарантаваць 100-адсоткавы вынік, калі прыйшлі да нас са скрынкай.
2006 год не стаў для нас пераломным, але дадаў вялікую дозу пазітыву, зараду на далейшую дзейнасць.
Чым яму запомніўся 2006-ты год, кажа грамадскі актывіст і журналіст Дзяніс Івашын:
– Татальнай зачысткай грамадскіх актывістаў падчас так званых прэзідэнцкіх выбараў. У нас у Гародні гэта закранула ўсе грамадскія аб’яднанні і палітычныя партыі. Увесь актыў сядзеў на нарах.
Адміністратар гарадзенскага форума Аляксей Радс:
– 2006 год запомніўся перш за ўсё затрыманнямі. Хоць у нас і не было масавых мерапрыемстваў.
Краязнаўца Ян Лялевіч:
– Плошчу-2006 мы ўспрымаем не толькі як лагер на Кастрычніцкай плошчы, а цэлы комплекс мерапрыемстваў пасля выбараў 2006 года. У маіх успамінах праяўляецца вялікая скруха, бо мы вельмі чакалі перамен і недзе ў глыбіні сэрца верылі, што выбары стануць пераломнымі.
Падзеі 2006 году сталі кавалкам беларускай гісторыі, пра тое што адбывалася на Плошчы напісаныя кнігі і знятыя дакументальныя фільмы. Людзі, удзельнікі тых падзей былі вымушаны звольніца, некаторыя з’халі за мяжу, ці змянілі сферу сваёй дзейнасці.
Беларускае Радыё Рацыя, Гародня
Фота RFE/RL
Глядзіце таксама
