Гародня: Затрыманні на Маршы „Народнага ўльтыматуму”
У Гародні, як паведамляе Hrodna.life , былі затрыманыя ад 80 да 100 чалавек. Дзясяткі людзей збіраюцца пад Ленінскім РАУС.
* * *
Падчас маршу на Савецкай вуліцы знік доктар гістарычных навук, прафесар Алесь Краўцэвіч. Ён не выходзіць на сувязь. Паводле «Белсату», яго затрымалі, ён у Ленінскім РАУСе.
* * *
У Гародні каля дзвюх тысяч чалавек выйшлі сёння на мірную акцыю пратэсту. “Гэта наш горад!” – скандавалі ўдзельнікі акцыі, ідучы па вуліцы Савецкай.
Падчас акцыі прайшлі жорсткія затрыманні. Сённяшні дзень адзначаецца самай вялікай колькасцю затрыманых за апошнія два месяцы.
* * *
15.14. Людзі вярнуліся на Савецкую пасля разгону і затрыманняў. Гарадзенцы шпацыруюць па цэнтры горада.
* * *
14.55. Сілавікі ў чорным і ў вайсковай форме расчышчаюць Савецкую вуліцу ад людзей. Адзінкавыя затрыманні, некаторых білі. Большасць людзей сышла ў двары. Вядома, што аднаго чалавека забрала хуткая.
Аднаго мужчыну сілавікі ўдарылі дручком па галаве, пайшла кроў. Пратэстоўцы, хто быў паблізу, аказалі дапамогу.
* * *
На вуліцы Савецкай сабралася ўжо каля тысячы чалавек. Людзі скандуюць «Гэта наш горад!». Каля сотні АМАПаўцаў стаіць шчыльным шэрагам пасярод вуліцы.
* * *
Сілавікі строем пайшлі па вуліцы Савецкай, літаральна выціснуўшы людзей з вуліцы.
Фота: Тут.бай
* * *
Людзі сабраліся ў цэнтры горада на вуліцы Савецкай, пляскаюць у далоні. Іх атачылі сілавікі. Яны стаяць па перыметры пляцоўкі. Людзі скандуюць: „Гэта наш горад!”
Фота: Тут.бай
У цэнтры горада ўзмоцненыя нарады ДАІ.
Беларускае Радыё Рацыя, Гародня
Фота: Сяргея Апановіча
