Гародня: прэс-сняданак ад хоспіса
Гарадзенскі дзіцячы хоспіс, каб падвесці вынікі 10-годдзя сваёй дзейнасці, правёў адмысловы прэс-сняданак для гарадзенскіх журналістаў. За 10 год працы прадстаўнікі хоспіса прынялі ўдел і правялі ў горадзе сотню розных мерапрыемстваў, каб азнаёміць гарадзенцаў з той дапамогай, якую аказвае хоспіс цяжкахворым дзеткам.
Пра адметную гісторыю арганізацыі кажа яго дырэктарка Вольга Вялічка:
– У 2008 годзе да мяне прыйшлі дзве матулі з цяжкахворымі дзецьмі і прапанавалі зрабіць арганізацыю для таго, каб дапамога цяжкахворым дзецям у Гародні была эфектыўнай. З таго пачаўся хоспіс. Мы сабралі людзей, якія сказалі, што могуць дапамагчы. І ў нас у штаце было два чалавекі і на той момант восем дзяцей. Прайшло дзесяць год. Сёння мы маем восем чалавек у штаце і ў нас 86 дзяцей – 86 сямей, якія знаходзяцца пад апекай. І гэта сем’і, якім мы аказваем дапамогу.
Па словах Вольгі Вялічкі, нават праз 10 год сваёй працы яны сутыкаюцца з рознымі праблемамі:
– Галоўная праблема ў тым, якім чынам зрабіць аказанне сацыяльных паслуг на новым роўні. Для нас гэта такі выклік на 2019 год. Мы б хацелі гэты год, 2018, завяршыць з тым, што мы распрацуем тры новыя сацыяльныя паслугі. Вельмі спадзяёмся, што нам гэта ўдасца, і спецыялісты з усёй краіны змогуць выкарыстоўваць нашыя напрацоўкі.
Прадстаўнікі хоспіса яшчэ цягам 2018 года прадставяць гарадзенцам свае новыя праекты, якія на іх думку будуць цікавыя жыхарам Гародні.
Беларускае Радыё Рацыя, Гародня
Глядзіце таксама
