Гародня: затрыманні на Маршы пенсіянераў (абноўлена)
Карэспандэнты БелаПАН у Гародні Марына Харэвіч і Сяргей Людкевіч, затрыманыя сёння днём „для праверкі дакументаў”, вызваленыя без складання пратаколаў. Яны асвятлялі пратэстную акцыю пенсіянераў у мясцовым парку Жылібера.
На такой самай падставе яны былі затрыманыя напярэдадні падчас Маршу гонару.
***
Прыкладна а 16 гадзіне на вуліцы Ажэшкі адбыліся затрыманні. Затрымана меркавана пяць чалавек.
* * *
У Гародні таксама адбываецца акцыя Марш пенсіянераў. Што адбываецца пад час акцыі распавядае наш журналіст Сяргей Апановіч.
– Каля сотні гарадзенскіх пенсіянераў таксама выйшлі на так званы Марш пенсіянераў. Яны рухаюцца невялікай калонай ад гарадзенскага парку Жылібера ў бок плошчы Леніна. Ужо з’явіліся першыя затрыманыя. Гэта журналісты, якія супрацоўнічаюць з БелаПАН – Сяргей Людкевіч і Марыся Харэвіч. Іх завезлі ў Ленінскі РАУС Гародні для праверкі дакументаў.
У Гародні ў парку імя Жылібера сабралася некалькі дзясяткаў пенсіянераў, якія спачатку сядзелі на лавачках каля фантана. Да прысутных бабуляў і дзядуляў падышлі двое міліцыянты, якія папярэдзілі пажылых людзей аб тым, што мерапрыемства несанкцыянаванае. Людзі пачалі абурацца, а праз нейкі час рушылі ў бок вуліцы Ажэшкі. У імправізаваным маршы ўдзельнічае каля ста чалавек, яны павярнулі на вуліцу Сацыялістычную, прайшоўшы каля будынка аблвыканкама, паведамляе tut.by.
Фота tut.by
Беларускае Радыё Рацыя
