Гародню з візітам наведаў новы Патрыяршы Экзарх усяе Беларусі Веніямін
Падчас візіту ў Гародню, новы Патрыяршы Экзарх Беларускай Праваслаўнай Царквы Маскоўскага патрыярхату адказваў на пытанні людзей па-беларуску.
Гэта першы такі выпадак у гісторыі адроджанай Беларусі. Дагэтуль – Экзархі не размаўлялі па-беларуску. Пасля ранішняй літургіі ў Свята-Пакроўскім праваслаўным Саборы Гародні, уладыка Веніямін, Экзарх Беларускай Праваслаўнай Царквы выслухаў прадстаўнікоў абласных арганізацыяў Таварыства беларускай мовы і Саюза беларускіх пісьменнікаў. Адказ яго быў па-беларуску:
– Хачу, калі ўладыка мяне падтрымае, каб Гарадзенская епархія была лепшай епархіяй Рускай Праваслаўнай Царквы. Памалілся трохі, пагаварылі, цяпер мы абмяркуем з уладыкам нейкія яшчэ пытанні духавенства і ўсё. Толькі разам у міры.
Уладыка выказаў надзею на падтрымку архіепіскапа Арцемія, што Гарадзенская епархія стане ўзорнай для ўсёй Царквы.
Усе ўдзельнікі размовы былі прыемна ўражаныя крокам наперад да беларускага народа з боку новага Праваслаўнага Экзарха.
Якуб Сушчынскі, Беларускае Радыё Рацыя, Гародня
