Глыбачане пра „Захад-2017”: Навошта пужаць людзей?
Адным – цікава, другім – весела, трэцім – рэальна страшна і непрыемна – такія пачуцці выклікаюць у глыбачанаў тэрытарыяльныя вучэнні “Захад-2017”.
Усё пачалося 14 верасня. У Глыбокім па мясцовым радыё, на сайтах раённай газеты і райвыканкама было нават абвешчана аб увядзенні каменданцкага часу. Але нечакана 15 верасня мясцовыя ўлады спахапіліся і абверглі інфармацыю. Грамадскасці яны паведамілі, што ўвядзенне каменданцкай гадзіны праводзілася без практычнага прымянення мер па абмежаванні і мела асабліва навучальны характар.
Глыбачане распавядаюць пра сваё стаўленне да вучэнняў:
– Адмоўнае. Я сам прымаў удзел у вучэннях, але такога дурдому тады не было. З аўтаматамі ходзяць па вуліцах.
– Не патрэбна гэта, таму што пужаюць старых людзей. Адна бабулька выйшла на вуліцу і ледзь не павалілася ад гэтых выбухаў. Кажа, што нават немцы ў вайну так не рабілі, як нашыя зараз робяць. Навошта так людзей пужаць?
– Страшна бывае, нават стралялі недалёка ад 3-й школы.
– Мініравалі бальніцу, “Еўраопт”, днём страляюць. Няхай вучацца, усялякае можа быць.
– А што мне гэтыя вучэнні? У іх свая праца, у мяне – свая. Я не разумею, навошта гэта? Трэба, каб мір быў. Навошта нам войны?
Падчас вучэнняў у Глыбоцкім раёне ўжо адпрацоўваліся задачы тэрытарыяльнай абароны, у тым ліку ў ахове і абароне важных аб’ектаў, барацьбе з дыверсійна-выведнымі групамі і незаконнымі ўзброенымі фармаваннямі. 18 верасня будуць адпрацоўвацца дзеянні пры захопе закладнікаў.
Таццяна Смоткіна, Беларускае Радыё Рацыя, Глыбокае
Фота: Tut.by
Глядзіце таксама
