Год таму прайшла самая масавая акцыя ў Гомелі
Год таму, 19 лютага 2017 года, у Гомелі прайшла адна з самых масавых акцый супраць прэзідэнцкага Дэкрэта №3 „Аб сацыяльным утрыманстве”. Гомельцы выйшлі ў цэнтр горада з транспарантамі і бел-чырвона-белымі сцягамі, каб выказаць нязгоду з адыёзным дэкрэтам.
Паводле аднаго з арганізатараў акцыі Уладзіміра Кацоры, ён асабіста прагназаваў, што на мітынг прыйдзе шмат людзей.
– Калі прайшла акцыя 17 лютага ў Менску, і выйшла няхай сабе не так багата людзей, недзе за 2 тысячы, але, як мы ведаем, іх не разагналі, таму ўжо была ўпэўненасць, што ў Гомелі акцыя таксама пройдзе.
Грамадскі актывіст Уладзімір Няпомняшчых заклікаў гомельцаў прыйсці на Плошчу Паўстання на антыдармаедскі мітынг.
– Гэта вельмі ўражлівае, нават цяпер, калі ўзгадваеш тыя падзеі. Крута, што людзі не захацелі быць быдлам, выйшлі на плошчу – і ўлада дала задні ход. Гэта пра многае сведчыць: у нас, беларускага народа, ёсць сіла, магчымасці і жаданне яднацца.
Паводле розных падлікаў, у гомельскай акцыі супраць Дэкрэта „Аб сацыяльным утрыманстве” 19 лютага 2017 года паўдзельнічала каля 3 тысячаў чалавек. Пасля гэтага мітынгу па ўсёй Беларусі пракаціліся аналагічныя пратэсныя акцыі з патрабаваннямі скасавання „дармаедскага дэкрэта”.
Беларускае Радыё Рацыя, Гомель
Глядзіце таксама
