Гомельцы супраць флагштоку за 650 тысяч даляраў ЗША
Гомельцы пратэстуюць супраць узвядзення гіганцкага флагштоку на плошчы Леніна.
У Інтэрнэце стартавалі некалькі петыцый, у якіх грамадзяне заклікаюць улады адмовіцца ад гэтай ідэі. Пабудова канструкцыі разам з добраўпарадкаваннем прылеглай тэрыторыі, паводле абвешчаных каштарысаў, будзе каштаваць гарадскому бюджэту больш за 650 тысяч даляраў ЗША.
Архітэктар Сяргей Ляпін заўважае, што дадзены аб’ект будуецца з парушэннем заканадаўства:
– Гэта канструкцыя, якая павінна паўстаць на плошчы Леніна. І служыць мэтам патрыятычнага выхавання гараджанаў. Але гэта наўпроставая праблема з заканадаўствам. Ёсць ахоўная зона палаца-паркавага ансамбля, у якой забараняецца пабудова наземных збудаванняў.
Гісторык Марыя Булавінская сумняецца ў тым, што з’яўленне на галоўнай гомельскай плошчы флагштоку вышынёй у 60 метраў паспрыяе пашырэнню патрыятычных пачуццяў гараджанаў.
– Калі сапраўды мы ставім пытанне ўзняць патрыятычныя пачуцці ў гараджанаў, то тут перспектыўна зрабіць тое, што ўжо гомельцы даўно патрабуюць ад уладаў – паставіць помнік Станіславу Шабунеўскаму. Гэта архітэктар, які пабудаваў вельмі шмат прыгожых будынкаў у цэнтры горада.
Паводле планаў гомельскіх гарадскіх уладаў, адкрыццё флагштоку з дзяржаўным сцягам адбудзецца падчас травеньскіх святаў.
Беларускае Радыё Рацыя
