Ігар Чаркашын: Брат не хацеў, каб мы хваляваліся (абноўлена)
Сям’я і паплечнікі Алеся Чаркашына рыхтуюць цырымонію развітання і чакаюць труну з целам у родным Берасці. У сям’і Чаркашына, добраахвотніка, які загінуў на ўсходзе Украіны, да апошняга моманту не ведалі пра тое, што ён ваюе.
Алесь Чаркашын (Фота svaboda.org)
Алесь да апошняга моманту не хацеў “падстаўляць” ні родных, ні паплечнікаў, таму не афішаваў свайго ўдзелу ў добраахвотніцкім руху. Апошнія размовы з байцом узгадвае яго родны брат Ігар:
– Апошні раз я яго бачыў у лютым-сакавіку, калі ён прыязджаў. Ён заўсёды быў пазітыўным, заўсёды ўсміхаўся. Пастаянна выходзіў на сувязь, казаў, што ў яго ўсё добра, каб мы не хваляваліся. Апошні раз выходзіў у скайп 8 ліпеня і пакінуў запіс: “Не хвалюйцеся, усё будзе добра!”
Гэта быў рэальны ўдар, не толькі для мяне, але і для бацькоў таксама, бо мы ўсе думалі, што ён знаходзіцца там выключна як прапаведнік, – зазначае Ігар Чаркашын. Сапраўды, Алесь вучыўся на аднім з багаслоўскіх факультэтаў і наведваў пратэстанцкую царкву, заўсёды меў пры сабе Біблію. Яго я не асуджаю, гэта выбар яго быў, з верай, я бачу ў гэтым нешта існае, – кажа брат.
Байцы „Правага сектара” развітваюцца з беларусам Алесем Чаркашыным (Фота Антося Цялежнікава)
Сябры Алеся Чаркашына, якія ўваходзяць у імправізаваны аргкамітэт па арганізацыі развітальнай цырымоніі і пахавання загінулага на усходзе Украіны добраахвотніка з Берасця, пакуль не могуць даць пэўнай інфармацыі пра дату, час і месца пахавання.
Падрабязней пра прычыны кажа Зміцер Шурхай, паплечнік Алеся:
– На дадзены момант цела нашага сябра пакуль знаходзіцца ў Запарожжы – у месцы, дзе ён памёр. Панядзелак працоўны дзень, таму з раніцы будуць вырашаць пытанні з дакументамі, але спадзяемся, што ў панядзелак машына з нашым сябрам вырушыць у бок Радзімы.
На цяперашні момант з дзясятак людзей у шчыльнай сувязі са сваякамі рыхтуюць належныя мерапрыемствы з нагоды смерці Алеся Чаркашына. Між сяброў, знаёмых і незнаёмых асобаў ужо пачаўся збор сродкаў на годнае ўшанаванне беларускага добраахвотніка.
Мікола Ляшкевіч, Беларускае Радыё Рацыя, Берасце
Глядзіце таксама
