Кастусь Каліноўскі – правадыр праўды, волі і справядлівасці
Правадыр Праўды, Волі і Справядлівасці – гэта эпітэты, якімі ўганаравалі беларусы падчас памінальных службаў Кастуся Каліноўскага, а таксама памаліліся за супакой душаў усіх дваццаці паўстанцаў, знойдзеных пад гарой Гедыміна ў Вільні.
Набажэнствы, што прайшлі ў храмах Вільні, а таксама жалобная працэсія да могілак Росы, дзе цяпер спачываюць славутыя героі беларускай нацыі, суправаджалася вялікай колькасцю беларускіх, бел-чырвона-белых сцягоў, якія асвятлілі старыя вулачкі Вільні.
Арцыбіскуп Тадэвуш Кандрусевіч у казанні 22-га лістапада, якое агучыў у архікатэдры Вільні, прыгадаў беларусам значэнне пралітай крыві «за бліжніх», як гэта зрабілі паўстанцы 1863-64 гадоў:
– Сваёй малітваю мы спадарожнічаем загінулым паўстанцам і даручаем іх душы міласэрнаму Богу. Вечны адпачынак да ім, Пане, а святло вечнае няхай ім свеціць, няхай адпачываюць у супакоі. Амен.
Прафесар гісторыі Вячаслаў Швед:
– Я тут, таму што гэта вельмі важная падзея, гістарычная. Яна сапраўды будзе запісаная ў аналаг гісторыі Беларусі. Вельмі важная падзея, проста чалавечая – нарэшце хаваем людзей вельмі блізкіх нам, тых, хто ў 1863-64 гг. устаў за адраджэнне Беларусі, Літвы, тых, хто паказаў сябе патрыётамі-беларусамі.
Удзельніца цырымоніі, спадарыня Валянціна Быстрык з Наваградку:
– Забілі іх, катавалі і самае страшнае – хацелі прынізіць і забраць імя, памяць. А тут вось момант ісціны. Вось столькі людзей прыйшло іх ушанаваць, значыць для такой колькасці людзей гэта важна. А колькі людзей не прыехала, бо не змаглі… Гэта гонар.
Агулам пілігрымаў з Беларусі ў дні ўшанавання памяці ўдзельнікаў нацыянальна-вызвольнага Паўстання Беларусі (Літвы) 1863-64 гадоў пабывала ў Вільні не менш за тры тысячы.
Якуб Сушчынскі, Беларускае Радыё Рацыя
Глядзіце таксама
