„Кепска – не ведаць роднай мовы, але яшчэ горш – не хацець яе ведаць”
Супольныя паходы ў тэатр, арганізацыя дабрачынных экскурсій, адраджэнне народных звычаяў, беларускамоўныя інтэлектуальныя гульні і забавы на вольным паветры – усё гэта незвычайныя фарматы працы віцебскіх курсаў “Мова Нанова”.
Такая разнастайнасць прываблівае слухачоў і ніколькі не замінае вывучаць мову нават у самых неверагодных месцах, кажа нязменная вядучая курсаў у Віцебску Таццяна Дубоўская:
– Адносна нядаўна ў нас быў супольны паход у лазню! Справа ў тым, што мы не толькі адпачывалі. Некаторыя нашы студэнты – даўнія аматары лазні, і яны сталі ініцыятарамі. І мы сапраўды атрымалі задавальненне, цудоўныя эмоцыі, і ў хуткім часе вы ўбачыце гэта ў нашых новых відэароліках.
Відэаролікі будуць пра тое, які венік больш карысны для здароўя. Такі фармат наведнікі курсаў асвойваюць ужо даўно: адным з першых быў відэаролік пра віцебскі прытулак для бяздомных жывёлаў. Бо даўно сталі часткай гарадской сацыяльна-культурніцкай прасторы, і курсанты аб’ядноўваюцца па інтарэсах, каб супольна далучацца да розных праектаў. Камусьці цікавы жывапіс, хтосьці марыць пра падарожжы, нехта прыгадвае дзяцінства і сваё навучанне ў вясковай беларускамоўнай школе, адны выпрабоўваюць свае здольнасці на майстар-класах, другія любяць спяваць ці таньчыць, і ўсё разам – гэта “Мова Нанова”.
Таццяна Дубоўская заўжды рада кожнаму новаму наведніку:
– Сорамна, канешне, не ведаць роднай мовы. Але яшчэ больш сорамна не мець жадання вывучаць родную мову, культуру, гісторыю. Як пачаць размаўляць па-беларуску? Што зрабіць, каб у горадзе стала больш беларускамоўных людзей? Мяркую, пачынаць трэба з сябе. Вельмі часта мне пішуць: “Таццяна, можна мне прыйсці на курсы? Я ўпершыню, можа, чагосьці не зразумею”… Канешне! Трэба адважыцца, пачаць, і ў вас усё атрымаецца!
Курсы “Мова Нанова – Віцебск” віншуюць усіх слухачоў Беларускага Радыё Рацыя з Міжнародным днём роднай мовы!
Цалкам гутарку з Таццянай Дубоўскай слухайце ў далучаным файле:
Ганна Ліпка, Беларускае Радыё Рацыя
