КХП-БНФ падала заяўку на Дзяды
Кансерватыўна-Хрысціянская Партыя – БНФ падала заяўку на правядзенне мемарыяльных мерапрыемстваў на Дзяды.
КХП-БНФ падала заяўку ў Менгарвыканкам і Менскі аблвыканкам на правядзенне традыцыйных мемарыяльных мерапрыемстваў на Дзяды 3 лістапада. Як паведамляюць заяўнікі, плануецца правядзенне шэсця і мітынга ў традыцыйным фармаце.
У Беларусі Дзяды — дзень памінання продкаў, карані якога палягаюць у язычніцтве. Палітычны фармат гэты дзень набыў 30 кастрычніка 1988 года, калі ўпершыню адбылося шэсце ў Курапаты. Такім чынам дзень памінання продкаў прыяднаўся да дня памяці ахвяр савецкіх рэспрэсій. У той дзень каля Усходніх могілак міліцыя зладзіла брутальны разгон удзельнікаў акцыі, але не здолела спыніць шэсце да ўрочышча.
Летась шэсце на Дзяды ў Менску прайшло ў трыццаты раз. Ужо традыцыйна ўдзельнікі збіраюцца ля Менскага гадзіннікавага заводу блізу станцыі метро «Парк Чалюскінцаў», і пешкі рушаць са сцягамі, крыжамі і кветкамі ва ўрочышча Курапаты, дзе адбываецца жалобны мітынг.
