КХП-БНФ ушанавала памяць слуцкіх паўстанцаў (абноўлена)
Да ўгодкаў Слуцкага збройнага чыну Кансерватыўна-хрысціянская партыя БНФ зладзіла традыцыйную экскурсію па мясцінах паўстання. Больш за 50 чалавек выправіліся з Менска, каб ушанаваць памяць герояў. Удзельнікі акцыі наведалі мястэчкі Грозава, Семежава ды Вызна. Завершылася мерапрыемства мітынгам у Слуцку.
„Нясіце слова праўды пра гісторыю Беларусі! Не забывайце герояў!” – заклікаў намеснік старшыні КХП-БНФ Юры Беленькі:
– Людзі ачмураныя, падманутыя прапагандай. Ідзіце да людзей, заклікайце ўдзельнічаць у такіх мерапрыемствах! Можна было б шмат гаварыць пра падзеі Слуцкага збройнага чыну і пра сваё шанаванне герояў. Але ў 100 разоў больш важнае тое, што гэтыя людзі ахвяравалі сваім вольным часам, праехаліся ў гэты непагодны дзень па ўсіх гэтых мясцінах і засведчылі на месцах сваю павагу.
97 гадоў таму на Случчыне ўспыхнула антыбальшавіцкае паўстанне, удзельнікі якога выступілі за ідэалы незалежнай Беларусі. Трыдыцыйна ўгодкі гэтых падзей адзначаюць прадстаўнікі незалежных партый і рухаў краіны, бо статусу дзяржаўнага свята гэтая падзея не мае дагэтуль.
[Not a valid template]
97-ыя ўгодкі Слуцкага збройнага чыну адзначылі сябры Кансерватыўна-хрысціянскай партыі БНФ, якія наведалі Грозава, Вызну і Семежава, а таксама зладзілі ў Слуцку мітынг:
– КХП-БНФ арганізавала экскурсію па мясцінах, якія звязаныя са Слуцкім збройным чынам. Да ўгодкаў гэтых славутых падзей беларускай гісторыі ўдзельнікі экскурсіі наведалі Грозава, Семежава і Вызну, якая цяпер называецца Чырвоная Слабада. Ва ўсіх гэтых мясцінах праходзілі невялікія мітынгі, ушанаванне, спявалі гімн “Магутны Божа”. Паўсюль прысутнічалі людзі ў цывільным, якія ўсё фіксавалі на камеру. У экскурсіі прымалі ўдзел каля 60-ці чалавек, таксама прысутнічала кіраўніцтва КХП-БНФ – Юрась Беленькі і Алесь Чахольскі. У мястэчку Грозава быў зачытаны зварот ад Зянона Пазьняка.
За экскурсіяй па мясцінах паўстанцаў Слуцкага збройнага чыну ды мітынгамі, якія зладзіла КХП-БНФ у нядзелю пільна сачылі людзі ў цывільным. Мясцовыя жыхары наадварот трымаліся ў баку ад мітынгоўцаў.
Прычыны растлумачыў адказны сакратар партыі Алесь Чахольскі:
– І раней ціснулі на іх, але прыходзілі. Людзі ў цывільным былі з намі ў Семежаве, Грозаве, Вызне, таксама ў Слуцку. Мясцовымі ўладамі былі дадзены каманды па школах, па фермах, каб не дай Бог туды прыйшлі людзі. Яны ствараюць такі мясцовы канцлагер.
„Назіральнікі” ў цывільным праехалі разам з мітынгоўцамі ўвесь маршрут ад вёскі Грозава да Слуцка. Арганізатары мяркуюць, што такія меры былі прынятыя адмыслова, каб запалохаць удзельнікаў акцыі, не гледзячы на тое, што яна дазволеная ўладамі.
[Not a valid template]
Слуцкі збройны чын – гэта паўстанне 1920 на Случчыне супраць Саветаў, у якім удзельнічалі пераважна жыхары навакольных вёсак. Паўстанне было здушана бальшавікамі.
Алена Вільтоўская, Беларускае Радыё Рацыя
Фота аўтаркі
Глядзіце таксама
