Колькасць палітзняволеных вырасла ў Беларусі да 140 чалавек
Беларускія праваабаронцы прызналі палітвязнямі яшчэ восем чалавек — у сувязі з выстаўленнем ім абвінавачванняў па артыкуле 293 КК (масавыя беспарадкі), а таксама па арт. 342 (групавыя дзеянні, якія груба парушаюць грамадскі парадак). Агульная колькасць палітвязняў вырасла ў Беларусі да 140 чалавек, паведамляе праваабарончы сайт spring96.org.
24 лістапада праваабарончыя арганізацыі выступілі з сумеснай заявай у сувязі з інфармацыяй аб выстаўленні абвінавачванняў па артыкуле 293 Крымінальнага кодэкса (масавыя беспарадкі) Сяргею Крыўчэню, Арцёму Мядзведскаму, Яўгену Курганаву, Дзмітрыю Жабуртовічу, а таксама па артыкуле 342 Крымінальнага кодэкса (групавыя дзеянні, якія груба парушаюць грамадскі парадак) Мікалаю Дзядку, Аляксею Самусенку, Кіму Самусенку, Паўлу Дразду.
Пераслед гэтых людзей праваабаронцы расцэньваюць як палітычна матываваны ў сувязі з рэалізацыяй імі свабоды мірных сходаў і выказвання свайго меркавання адносна абвешчаных вынікаў выбараў прэзідэнта.
„Таксама адзначаем, што кваліфікацыя дзеянняў Кіма Самусенкі і Паўла Дразда па арт. 349 КК РБ (несанкцыянаваны доступ да камп’ютарнай інфармацыі), не можа з’яўляцца падставай для абрання меры стрымання ў выглядзе ўтрымання пад вартай, нават пры наяўнасці гэтага складу злачынства ў іх дзеяннях”, — гаворыцца ў заяве.
Прадстаўнікі праваабарончых арганізацый патрабуюць ад уладаў неадкладна вызваліць з-пад варты і спыніць крымінальны пераслед пералічаных грамадзян, усіх палітвязняў і тых, хто быў затрыманы ў сувязі з рэалізацыяй свабоды мірных сходаў у поствыбарчы перыяд, а таксама спыніць палітычныя рэпрэсіі ў краіне.
Праваабаронцы падкрэсліваюць, што сходы грамадзян насілі мірны характар і не ўяўлялі пагрозы ні нацыянальнай, ні грамадскай бяспецы. Нягледзячы на гэта дэманстранты былі атакаваныя спецпадраздзяленнямі МУС з непрапарцыйным ужываннем фізічнай сілы, спецсродкаў і зброі.
Праваабаронцы перакананыя, што дэманстранты не рабілі дзеянняў, якія апісаныя ў арт. 293 КК, таму іх дзеянні не могуць кваліфікавацца як масавыя беспарадкі. Удзельнікі пратэстаў, адзначылі яны, „не здзяйснялі падпалаў, пагромаў, не знішчалі маёмасць і не аказвалі збройнага супраціву праваахоўным органам”.
„Асобныя выпадкі гвалтоўных дзеянняў у дачыненні да супрацоўнікаў міліцыі з боку дэманстрантаў патрабуюць асобнай прававой кваліфікацыі, з улікам кантэксту і абставінаў прымянення гвалту, у тым ліку ў кантэксце самаабароны ад загадзя непрапарцыйных дзеянняў супрацоўнікаў міліцыі”, — гаворыцца ў заяве.
Дакумент падпісалі восем праваабарончых арганізацый: цэнтр „Вясна”, „Прававая ініцыятыва”, Беларускі дакументацыйны цэнтр, Беларускі Хельсінкскі камітэт, Беларускі дом правоў чалавека імя Барыса Звозскава, Цэнтр прававой трансфармацыі Lawtrend, ініцыятыўная група „Ідэнтычнасць і права”, кансультацыйны цэнтр „Х’юман Канстанта”.
