Кубкі з беларускімі кветкамі і вершамі
Спалучыць прыгожае пісьменства з беларускімі раслінамі, краскамі, кветкамі здолела гаспадыня гарадзенскай крамы „Адметнасць” Вольга Верамеенка.
Дваццаць чатыры керамічныя кубкі складаюць тэматычную нізку „Беларускія расліны”. Каб людзі не забываліся на беларускія назвы – галоўная ідэя прадукту.
Кажа Вольга Верамеенка:
– Мне заўсёды хацелася нечага такога прыгожага, цікавага. І кветкі… я ж увогуле яшчэ і аграном. І кветкі – гэта маё ўсё. Мне хацелася нейкія вельмі прыгожыя кубачкі. Мяккага, жаночага, прыгожага. І вось да мяне прыйшла такая думка, што я зраблю кубачкі менавіта з беларускімі кветачкамі. Гэта нашыя кветкі, якія растуць у Беларусі, з беларускімі назвамі, менавіта каб ведалі назвы нашых беларускіх кветак.
На кубках разам з раслінамі цытаты з вершаў нашых славутых паэтаў: Наталлі Арсенневай, Ларысы Геніюш, Уладзіміра Караткевіча, Уладзіміра Дубоўкі ды іншых.
Якуб Сушчынскі, Беларускае Радыё Рацыя
Фота аўтара
