Легенды і паданні ў працах разьбяроў
Міжнародны пленэр разьбяроў па дрэве „Вобразы народных майстроў”, што праходзіў недалёка ад Гародні, у маёнтку Каробчыцы, прысвяцілі легендам і паданням Літвы, Латвіі і Беларусі. 12 прац, што зрабілі майстры, упрыгожаць пляцоўку гарадзенскага цэнтра рамёстваў, што ў хуткім часе з’явіцца ў Гародні на вуліцы Рэйманта. Гэты пленэр адбываўся ў рамках транспамежнага праекта „Адраджэнне і захаванне культурнай і гістарычнай спадчыны ў Гародні і Даўгаўпілсе”, праграмы супрацы Літва – Латвія – Беларусь.
Пра сустрэчу распавядае камісар выставы, гарадзенскі разбяр Мікалай Скляр:
– Пленэр прайшоў у сяброўскай атмасферы і ўзаемаразуменні. У прынцыпе, усё было добра, усе справіліся са сваім заданнем. Ну а што тычыцца маёй працы, то ёсць такая легенда, што калісьці частка Беларусі была пад вадой. І гэтую лужыну называлі мора Герадот, якое насялялі розныя вадаплаваючыя істоты, падобныя да дыназаўраў.
Апроч легендаў, майстры стварылі і народныя вобразы: дзяўчына з хлебам, якая размесціцца на ўваходзе цэнтра рамёстваў, а таксама ткачыха і каваль, вырабленыя з дрэва беларускімі майстрамі Ірынай Кушнерук і Валянцінам Багдзевічам, якія стануць упрыгожваннем падворка цэнтра.
[Not a valid template]
Беларускае Радыё Рацыя, Гародня
Фота Савелія Малчанава
Глядзіце таксама
